തിരുവനന്തപുരം : ഗുലാബ് ചുഴലിക്കാറ്റിന്റെ ഭാഗമായി കഴിഞ്ഞ രണ്ട് ദിവസമായി അനുഭവപ്പെടുന്ന മഴയുടെ ശക്തി ഇന്ന് കുറയും. ബംഗാൾ ഉൾക്കടലിൽ നിന്നും കരയിലേക്ക് പ്രവേശിച്ച ഗുലാബ് ചുഴലിക്കാറ്റ് തീവ്രന്യൂനമർദ്ദമായി മാറിയ സാഹചര്യത്തിലാണ് മഴയുടെ ശക്തി കുറയുന്നത്. ഉച്ചയോടെ തീവ്രന്യൂനമർദ്ദം ന്യൂനമർദ്ദമായി മാറും.
കാസർകോട്, കണ്ണൂർ, കോഴിക്കോട് എന്നീ ജില്ലകളിലെ ഒറ്റപ്പെട്ട മേഖലകളിൽ മാത്രമേ ശക്തമായ മഴ ലഭിക്കൂവെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം. ഇതിന്റെ അടിസ്ഥാനത്തിൽ മൂന്ന് ജില്ലകളിലും യെല്ലോ അലർട്ട് പ്രഖ്യാപിച്ചു. ജില്ലകളിൽ 24 മണിക്കൂറിൽ 64.5 മുതൽ 115.5 മില്ലീ മീറ്റർവരെ മഴ ലഭിക്കുമെന്നാണ് പ്രവചനം.
അതേസമയം സംസ്ഥാനത്ത് ശക്തമായ മഴ ലഭിച്ചെങ്കിലും അണക്കെട്ടുകളിലെ ജലനിരപ്പിന്റെ കാര്യത്തിൽ ആശങ്കപ്പെടേണ്ടതില്ലെന്ന് കെഎസ്ഇബി അറിയിച്ചു. ഇടുക്കി, ഇടമലയാർ തുടങ്ങി പ്രധാന അണക്കെട്ടുകളിൽ ജലം തുറന്നു വിടേണ്ട സാഹചര്യമില്ലെന്നും കെഎസ്ഇബി വ്യക്തമാക്കി.
Comments