ന്യൂഡൽഹി: സെപ്തംബറിൽ ജിഎസ്ടി വരുമാനത്തിൽ വർധന. സെപ്തംബറിലെ ആകെ വരുമാനം 1.17 ലക്ഷം കോടി രൂപയാണ്. ഓഗസ്റ്റ് മാസത്തേക്കാൾ അയ്യായിരം കോടിയുടെ വർധനയുണ്ടായി. കഴിഞ്ഞ മാസം 1.12 ലക്ഷം കോടിയുടെ വരുമാനമാണ് രാജ്യത്തിന് ലഭിച്ചത്. ഇതോടെ 2021-2022(ഏപ്രിൽ-സെപ്തംബർ) അർധ വാർഷികത്തിലെ ജിഎസ്ടി വരുമാനം 6.82 ലക്ഷം കോടിയായി.
തുടർച്ചയായി മൂന്നാം മാസത്തിലാണ് ജിഎസ്ടി വരുമാനം ഒരു ലക്ഷത്തിന്മേൽ ലഭിക്കുന്നത്. കൊറോണയുടെ രണ്ടാം തരംഗത്തിന്റെ ആഘാതത്തിൽ നിന്ന് രാജ്യത്തിന്റെ സാമ്പത്തിക മേഖല കരകയറിയതായി വരുമാനത്തിലെ വർധനവ് സൂചിപ്പിക്കുന്നുവെന്ന് സാമ്പത്തിക വിദഗ്ധർ വിലയിരുത്തുന്നു.
ജിഎസ്ടി വരുമാനം 2020 ഒക്ടോബർ മുതൽ 2021 മെയ് വരെ ഒരു ലക്ഷത്തിന് മുകളിൽ നേടിയിരുന്നു. എന്നാൽ കൊറോണയുടെ രണ്ടാം തരംഗം കാരണം ജൂണിലെ വരുമാനം 92,849 കോടിയായി താഴ്ന്നിരുന്നു. എന്നാൽ പിന്നീടുളള മാസങ്ങളിൽ സ്ഥിതി പൂർവ്വസ്ഥിതിയിലായി.
