അഭ്യൂഹങ്ങൾക്ക് മറുപടിയുമായി ധോണി; ഐപിഎല്ലിൽ നിന്നും ഈ വർഷം വിരമിക്കില്ലെന്ന പ്രഖ്യാപനവുമായി ക്യാപ്റ്റൻ കൂൾ

ചെന്നൈ: ഐപിഎല്ലിൽ നിന്നും ധോണി വിരമിക്കുന്നു എന്ന ആരാധകരുടെ ഊഹാപോഹങ്ങൾക്ക് മറുപടിയുമായി ക്യാപ്റ്റൻ കൂൾ രംഗത്ത്. ഇത് തന്റെ അവസാന സീസൺ അല്ലെന്നും ഇനിയും ഒരു സീസണിൽ കൂടെ മത്സരിക്കുമെന്ന മറുപടിയാണ് ചെന്നൈ സൂപ്പർ കിംഗ്‌സ് ക്യാപ്റ്റൻ അറിയിച്ചത്. ഇന്ത്യൻ സിമന്റ്‌സിന്റെ 75-ാം വാർഷികാഘോഷ പരിപാടിയിലാണ് ധോണി ഇക്കാര്യം വ്യക്തമാക്കിയത്.

‘ചെന്നൈയ്‌ക്ക് വേണ്ടി കളിക്കുമ്പോൾ ആരാധകർക്കായി ഒരു വിടവാങ്ങൽ മത്സരം സംഘടിപ്പിക്കും. അന്താരാഷ്‌ട്ര ക്രിക്കറ്റിൽ നിന്നും ആരാധകർക്ക് ലഭിക്കാഞ്ഞത് അന്ന് നൽകുന്നതാണ്.’ അന്തരാഷ്‌ട്ര ക്രിക്കറ്റിൽ നിന്നും വിരമിക്കുന്നതിനു മുൻപ് എന്തുകൊണ്ടാണ് ഇന്ത്യയ്‌ക്കായി ഒരു വിടവാങ്ങൽ മത്സരത്തിൽ കളിക്കാഞ്ഞത് എന്ന ചോദ്യത്തിന് ഉത്തരമായാണ് ക്യപ്റ്റൻ കൂൾ ഈ പ്രസ്താവന നടത്തിയത്.

ഇതിനർത്ഥം ധോണി ഐപിഎല്ലിൽ നിന്നും ഈ വർഷം വിരമിക്കില്ല. അടുത്ത സീസണിനു മുന്നോടിയായി താരങ്ങളുടെ ലേലത്തിൽ ധോണി ഉണ്ടാവില്ലെന്നാണ് അഭ്യൂഹങ്ങൾ പരന്നത്. എന്നാൽ ധോണി തന്നെ ഇതിനു മറുപടി നൽകിയത് ആരാധകർക്ക് വലിയ ആശ്വാസമാണ് നൽകിയിരിക്കുന്നത്.

ആരാധകരെ ഞെട്ടിച്ച് 2020 ഓഗസ്റ്റ് 15നാണ് ധോണി അന്താരാഷ്‌ട്ര ക്രിക്കറ്റിൽ നിന്നും വിരമിച്ചത്. വളരെ അധികം വിഷമത്തോടെയായിരുന്നു ആരാധകർ ധോണിയുടെ വിരമിക്കൽ ഉൾക്കൊണ്ടത്.