ഉത്ര വധക്കേസ്: സൂരജിനെതിരെ നിർണ്ണായകമായത് പ്രോസിക്യൂഷന്റെ ശക്തമായ തെളിവുകൾ, കേസിന്റെ നാൾ വഴികൾ

കൊല്ലം: ഉത്ര കേസിൽ സൂരജ് കുറ്റക്കാരനെന്ന് കോടതി. പ്രോസിക്യൂഷൻ സമർപ്പിച്ച ശക്തമായ ശാസ്ത്രീയ തെളിവുകൾ ഉൾപ്പെടെ അടിസ്ഥാനമാക്കിയായിരുന്നു കോടതി സൂരജ് കുറ്റക്കാരനെന്ന് കണ്ടെത്തിയത്. സംസ്ഥാനത്തിന്റെ ചരിത്രത്തിൽ തന്നെ സമാനതകൾ ഇല്ലാത്ത കേസായിരുന്നു ഇത്.

കൊല്ലം അഡീഷണൽ സെഷൻസ് കോടതിയിലാണ് കേസ് പരിഗണിച്ചത്. സാമ്പത്തികനേട്ടം മാത്രം ലക്ഷ്യമാക്കി ഉത്രയെ വിവാഹം ചെയ്ത സൂരജ് ഭിന്നശേഷിക്കാരിയായ ഉത്രയെ ആസൂത്രിതമായി കൊലപ്പെടുത്തിയെന്നാണ് പോലിസിന്റെ കുറ്റപത്രം. 2020 മെയ് ആറിനാണ് സൂരജ് ഭാര്യയെ കൊലപ്പെടുത്തിയത്. സൂരജ് മാത്രമാണ് കേസിലെ പ്രതി.

സൂരജിന് പാമ്പിനെ നൽകിയ സുരേഷ് കേസിൽ മാപ്പ് സാക്ഷിയാണ്. കേട്ടുകേൾവി ഇല്ലാത്ത രീതിയിൽ വിഷ പാമ്പുകളെ ഉപയോഗിച്ചായിരുന്നു സൂരജ് കൊലപാതകം നടത്തിയത്. അതുകൊണ്ട് തന്നെ കേസ് സംസ്ഥാനത്തിന്റെ കുറ്റാന്വേഷണ ചരിത്രത്തിൽ ഇടം പിടിക്കുകയും ചെയ്തു.

ഉത്രയുടെ വീട്ടുകാർ ഇടഞ്ഞതോടെ സ്ത്രീധനമായി ലഭിച്ച സ്വർണ്ണാഭരണങ്ങളും കാറും പണവും നഷ്ടപെടുമെന്ന ആശങ്കയിലാണ് പാമ്പിനെക്കൊണ്ട് കടിപ്പിച്ചു കൊല്ലാൻ സൂരജ് തീരുമാനിച്ചത്. ജീവനുള്ള ഒരു വസ്തു കൊലപാതകത്തിനുള്ള ആയുധമായി ഉപയോഗിച്ചു എന്നതായിരുന്നു കേസിൽ അന്വേഷണ ഉദ്യോഗസ്ഥർ നേരിട്ട ഏറ്റവും വലിയ വെല്ലുവിളി.

ഉത്ര കേസ് നാൾ വഴികൾ

2018 മാർച്ച് 25 ഉത്രയുടേയും സൂരജിന്റേയും വിവാഹം
>2020 മാർച്ച് 2 ഉത്രക്ക് ആദ്യം പാമ്പുകടി ഏൽക്കുന്നു, അണലിയെ കൊണ്ട് കടിപ്പിക്കാൻ ശ്രമിച്ചു
>മാർച്ച് രണ്ട് മുതൽ ഏപ്രിൽ 22 വരെ തിരുവല്ല പുഷ്പഗിരി ആശുപത്രിയിൽ ചികിത്സയിൽ
>ഏപ്രിൽ 22ന് ഉത്രയുടെ അഞ്ചൽ ഏറത്തുള്ള വീട്ടിലേക്ക്
>ഏപ്രിൽ 22 നും മെയ് 7 നും ഇടയിൽ സൂരജ് അവിടേക്ക് ഇടയ്‌ക്കിടെ സന്ദർശനം
>മെയ് ആറിന് അവസാനം സൂരജ് വീട്ടിലെത്തി
>മെയ് ഏഴിന് ഉത്രയുടെ മരണം അന്ന് മുതൽ തന്നെ വീട്ടുകാർക്ക് സംശയം
>മെയ് ഏഴിന് തന്നെ അസ്വാഭാവിക മരണത്തിന് പോലിസ് കേസെടുത്തു
>മെയ് 12ന് വീട്ടുകാർ പോലിസ് നടപടി ശക്തമാക്കണമെന്ന് ആവശ്യപ്പെടുന്നു
>മെയ് 19 ന് ഉത്രയുടെ അച്ഛനും അമ്മയും ചേർന്ന് റൂറൽ എസ് പി ഹരിശങ്കറിന് പരാതി നൽകി
> മെയ് 23 സൂരജിന് മൂർഖനെ നൽകിയ സുരേഷ് അറസ്റ്റിൽ, തൊട്ടുപിന്നാലെ സൂരജും
>ജൂലൈ 7ന് സ്‌പെഷ്യൽ പബ്ലിക് പ്രോസിക്യൂട്ടർ ആയി ജി മോഹൻ രാജിനെ നിയമിച്ചു
>ജൂലൈ 14ന് തെളിവെടുപ്പിനിടെ സൂരജിന്റെ പരസ്യ കുറ്റസമ്മതം ‘ഉത്രയെ കൊന്നത് ഞാൻ തന്നെ’
>ജൂലൈ18ന് ഉത്രയുടെ ആന്തരിക അവയവങ്ങളിൽ മൂർഖന്റെ വിഷത്തോടൊപ്പം മയക്കുഗുളികളും
>ജൂലൈ 28 സൂരജിന് പാമ്പിനെ നൽകിയ സുരേഷിനെ മാപ്പ് സാക്ഷിയാക്കി.
>ജൂലൈ30 കൊലപാതകം ഡമ്മി ഉപയോഗിച്ച് പുനരാവിഷ്‌കരിച്ചു.
>2020 ഓഗസ്റ്റ് 14 പുനലൂർ ഫസ്റ്റ് ക്ലാസ് മജിസ്‌ട്രേറ്റ് കോടതിയിൽ കുറ്റപത്രം സമർപ്പിച്ചു
>2021ഒക്ടോബർ 11ന് കൊല്ലം അഡീഷണൽ സെഷൻസ് കോടതി സൂരജ് കുറ്റക്കാരനാണെന്ന് കണ്ടെത്തി.

പോലീസിന്റെ അന്വേഷണ വഴികൾ

>പാമ്പിന്റെ പോസ്റ്റുമോർട്ടം നടത്തി
>പാമ്പിനെ കൊണ്ട് ഡമ്മി പരീക്ഷണം
>പാമ്പിനെ വിറ്റയാളെ കണ്ടെത്തി
> വിദേശത്തുള്ള പാമ്പ് വിദഗ്ധരുടേയും നിർദ്ദേശങ്ങൾ തേടി
>കേസിലെ ഡിഎൻഎ ഫലവും നിർണ്ണായകമായി