ഷാർജ: ട്വന്റി 20 ലോകകപ്പിൽ സ്കോട്ട്ലാന്റിനെ 130 റൺസിന് തകർത്ത് അഫ്ഗാനിസ്ഥാൻ. ആദ്യം ബാറ്റ് ചെയ്ത് അഫ്ഗാനിസ്ഥാൻ നാല് വിക്കറ്റ് നഷ്ടത്തിൽ 190 റൺസ് നേടി. തുടർന്ന് ബാറ്റിങ്ങിനിറങ്ങിയ സ്കോട്ട്ലാന്റ് 10.2 ഓവറിൽ 60 റൺസിന് എല്ലാവരും പുറത്തായി. അഞ്ച് വിക്കറ്റ് വീഴ്ത്തിയ മുജീബുർ റഹ്മാൻ സ്കോട്ട്ലാന്റിനെ തകർത്തെറിയുകയായിരുന്നു. സ്കോട്ടിഷ് ടീം ആദ്യ മൂന്ന് ഓവറിൽ വിക്കറ്റ് നഷ്ടപ്പെടാതെ 28 റൺസെടുത്തു. എന്നാൽ 60 റൺസ് തികയ്ക്കുബോഴേക്കും എല്ലാവരും അവിശ്വസനീയമായ വിധത്തിൽ പുറത്താകുകയായിരുന്നു.
അഫ്ഗാന് വേണ്ടി മുജീബുർ റഹ്മാൻ നാലോവറിൽ വെറും 20 റൺസ് മാത്രം വിട്ടുനൽകി അഞ്ചുവിക്കറ്റ് വീഴ്ത്തി. റാഷിദ് ഖാൻ മൂന്നുവിക്കറ്റെടുത്തപ്പോൾ ഒരെണ്ണം നവീൻ ഉൾഹഖ് സ്വന്തമാക്കി. നേരത്തെ ടോസ് നേടിയ അഫ്ഗാൻ ബാറ്റിങ് തെരഞ്ഞെടുത്തു. നജീബുളള സദ്രാൻ(59) ആണ് മികച്ച സ്കോറിലേക്ക് അഫ്ഗാൻ ടീമിനെ നയിച്ചത്. ഹസ്റത്തുളള സസായ്(44),റഹ്മാനുളള ഗുർബാസ്(46) എന്നിവരും അഫ്ഗാൻ നിരയിൽ തിളങ്ങി.
