കാണാൻ സുന്ദരി, വാ തുറന്നാൽ ഭരണിപ്പാട്ടിനേക്കാൾ ഭയാനകമായ വർത്തമാനം; അധിക്ഷേപ പരാമർശത്തിൽ കെ മുരളീധരനെതിരെ പരാതി നൽകി ആര്യാ രാജേന്ദ്രൻ

തിരുവനന്തപുരം : കോൺഗ്രസ് എംപി കെ മുരളീധരനെതിരെ പോലീസിൽ പരാതി നൽകി തിരുവനന്തപുരം കോർപ്പറേഷൻ മേയർ ആര്യാ രാജേന്ദ്രൻ. മുരളീധരന്റെ അധിക്ഷേപ പരാമർശത്തിലാണ് പരാതിയുമായി മേയർ മ്യൂസിയം പോലീസിനെ സമീപിച്ചിരിക്കുന്നത്. പരാതിയിൽ നിയമോപദേശം തേടിയ ശേഷം പോലീസ് കേസ് എടുക്കും.

രാവിലെയാണ് പരാതിയുമായി ആര്യ രാജേന്ദ്രൻ പോലീസിനെ സമീപിച്ചത്. സ്ത്രീകളെ മോശക്കാരായി ചിത്രീകരിക്കാനുള്ള എല്ലാ ശ്രമങ്ങളെയും ചെറുക്കുമെന്ന് പരാതി നൽകിയ ശേഷം ആര്യാ രാജേന്ദ്രൻ പറഞ്ഞു. മുരളീധരന് അദ്ദേഹത്തിന്റെ സംസ്‌കാരമാണ് കാണിച്ചത്. തനിക്ക് ആ നിലയിൽ താഴാനാകില്ല. നിയമപരമായി മുന്നോട്ട് പോകുമെന്നും മേയർ പ്രതികരിച്ചു.

ഇന്നലെ ഡിസിസി കോർപ്പറേഷൻ ആസ്ഥാനത്ത് സംഘടിപ്പിച്ച ധർണയിലാണ് ആര്യാ രാജേന്ദ്രനെതിരെ മുരളീധരൻ അധിക്ഷേപ പരാമർശങ്ങൾ ഉന്നയിച്ചത്.
എം.പി.പത്മനാഭനെ പോലെ ഉള്ളവർ ഇരുന്ന കസേരയിലാണ് ആര്യ രാജേന്ദ്രൻ ഇരിക്കുന്നത്. അതുകൊണ്ട് തന്നെ വിനയപൂർവ്വം പറയാം. ദയവായി അരക്കള്ളൻ മുക്കാൽക്കള്ളനിലെ കനകസിംഹാസനത്തിൽ എന്ന പാട്ട് ഞങ്ങളെ കൊണ്ട് പാടിക്കരുത് എന്ന് മാത്രമാണ് പറയാനുള്ളത്. കാണാൻ നല്ല സൗന്ദര്യമൊക്കെയുണ്ട്. പക്ഷേ വായിൽ നിന്ന് വരുന്നത് കൊടുങ്ങല്ലൂർ ഭരണിപ്പാട്ടിനേക്കാൾ ഭയാനകമായ ചില വർത്തമാനങ്ങളാണ്. ഇതൊക്കെ ഒറ്റ മഴയത്ത് മാത്രം കിളിർത്തതാണ്. ആ മഴയുടെ ഇത് കഴിയുമ്പോഴേക്കും സംഭവം തീരും. അങ്ങനെയുള്ള ഒരുപാട് പേരെ കണ്ടിട്ടുള്ള നഗരസഭയാണ് ഇതെന്ന് ഓർമ്മിപ്പിക്കുകയാണെന്നായിരുന്നു മുരളീധരന്റെ പരാമർശം.