കൊച്ചി: ഏക മകളുടെ മരണവാർത്ത താങ്ങാനാവാതെ അമ്മ വിഷം കഴിച്ച് ആത്മഹത്യക്ക് ശ്രമിച്ചു. വാഹനാപകടത്തിൽ മരിച്ച മുൻ മിസ് കേരള അൻസി കബീറിന്റെ അമ്മയാണ് ആത്മഹത്യയ്ക്ക് ശ്രമിച്ചത്. ഇന്ന് പുലർച്ചെയാണ് വൈറ്റിലയിൽ ഉണ്ടായ വാഹനാപകടത്തിലാണ് മുൻ മിസ് കേരള അൻസി കബീറും റണ്ണറപ്പ് അഞ്ജന ഷാജനും മരിച്ചത്.
ആലംകോട് പാലാകോണം സ്വദേശിയാണ് അൻസി കബീർ. ഏക മകളുടെ മരണ വാർത്ത അറിഞ്ഞ ശേഷം അമ്മ റസീനയാണ് വിഷം കഴിച്ച് ആത്മഹത്യയ്ക്ക് ശ്രമിച്ചത്. റസീനയെ ഉടൻ തന്നെ കിംസ് ആശുപത്രിയിൽ പ്രവേശിപ്പിച്ചു. ഇവർ 24 മണിക്കൂർ നിരീക്ഷണത്തിലാണ്.
ഫോർട്ട് കൊച്ചിയിൽ നിന്നും ഡിജെ പാർട്ടി കഴിഞ്ഞ് മടങ്ങവെയാണ് അൻസി കബീറും അഞ്ജന ഷാജനും വാഹനാപകടത്തിൽ പെട്ടത്. ഇവരോടൊപ്പം സുഹൃത്തുക്കളായ മുഹമ്മദ് ആഷിഖ്, അബ്ദുൾ റഹ്മാൻ എന്നിവരും കാറിൽ ഉണ്ടായിരുന്നു. പാർട്ടി കഴിഞ്ഞ് തൃശൂരിലേയ്‌ക്കുള്ള യാത്രക്കിടെ എറണാകുളം ബൈപ്പാസ് റോഡിൽ ഹോളിഡേ ഇൻ ഹോട്ടലിനു മുന്നിൽ വച്ചായിരുന്നു അപകടം.
അമിത വേഗതയിലായിരുന്ന കാർ മുന്നിലെ ബൈക്കിനെ മറികടക്കുന്നതിനിടെ തട്ടി നിയന്ത്രണം വിട്ട് മരത്തിലിടിച്ച് മറിയുകയായിരുന്നു. അപകടത്തിൽ കാർ പൂർണ്ണമായും തകർന്നു. അൻസിയും അഞ്ജനയും സംഭവസ്ഥലത്ത് തന്നെ മരിച്ചു.
Comments