അയോദ്ധ്യ: പെട്രോളിനും ഡീസലിനും നികുതി ഇളവ് നൽകിയ തീരുമാനത്തിൽ പ്രധാനമന്ത്രി നരേന്ദ്രമോദിക്ക് നന്ദി അറിയിച്ച് യുപി മുഖ്യമന്ത്രി യോഗി ആദിത്യനാഥ്. ദീപാവലിയുടെ അവസരത്തിൽ രാജ്യത്തിന് ലഭിച്ച സമ്മാനമാണ് ഈ തീരുമാനമെന്നും യോഗി ആദിത്യനാഥ് പറഞ്ഞു. ‘ പെട്രോളിനും ഡീസലിനും എക്സൈസ് നികുതി കുറച്ച തീരുമാനത്തിന് പ്രധാനമന്ത്രി നരേന്ദ്രമോദിയോട് നന്ദി പറയുന്നുവെന്നും’ അദ്ദേഹം പറഞ്ഞു. അയോദ്ധ്യയിലെ ഹനുമാൻ ഗർഹി ക്ഷേത്രത്തിൽ അർച്ചന നടത്തിയതിന് ശേഷം സംസാരിക്കുകയായിരുന്നു അദ്ദേഹം. രാം ജന്മഭൂമിയിലെ രാം ലല്ലയിലും അദ്ദേഹം പുലർച്ചെ പ്രാർത്ഥന നടത്താൻ എത്തിയിരുന്നു.
‘ സംസ്ഥാനത്തെ എല്ലാ ജനങ്ങൾക്കും ദീപാവലി ആശംസകൾ നേരുകയാണ്. എല്ലാ വീടുകളിലും ലക്ഷ്മി ദേവിയുടെ അനുഗ്രഹത്താൻ സന്തോഷവും സമാധാനവും ആരോഗ്യവും സമൃദ്ധിയും നിറയട്ടെ എന്ന് ആശംസിക്കുകയാണ്. എല്ലാ ജനങ്ങൾക്കും ഭഗവാൻ ശ്രീരാമന്റേയും അനുഗ്രഹം ഉണ്ടാകട്ടെ. സന്തോഷത്തിന്റെ ഈ അവസരത്തിൽ എല്ലാവർക്കും ആശംസകൾ നേരുന്നുവെന്നും’ യോഗി ആദിത്യനാഥ് പറഞ്ഞു.
