ന്യൂഡൽഹി : ദക്ഷിണാഫ്രിക്കൻ ഇതിഹാസതാരം എ.ബി ഡിവില്ലിയേഴ്‌സിന്റെ വിരമിക്കാനുള്ള തീരുമാനം അതിയായ ദു:ഖം ഉളവാക്കുന്നതായി ഇന്ത്യൻ ക്രിക്കറ്റ് മുൻ ക്യാപ്റ്റൻ വിരാട് കൊഹ്ലി. ഡിവില്ലിയേഴ്‌സിന്റെ വിരമിക്കൽ പ്രഖ്യാപനത്തിന് പിന്നാലെ ട്വിറ്ററിലൂടെയായിരുന്നു കൊഹ്ലിയുടെ പ്രതികരണം. എ.ബി ഡിവില്ലിയേഴ്‌സിന്റെ പ്രഖ്യാപനം ഹൃദയഭേദകമാണെന്ന് വിരാട് കൊഹ്ലിയുടെ ഭാര്യയും ബോളിവുഡ് താരവുമായ അനുഷ്‌ക ശർമ്മയും പറഞ്ഞു. വിരാട് കോഹ്ലി നയിക്കുന്ന ഐപിഎൽ ടീമായ റോയൽ ചാലഞ്ചേഴ്‌സിലെ പ്രധാനിയാണ് എ ബി ഡിവില്ലിയേഴ്‌സ്.
തങ്ങളുടെ തലമുറയിലെ മികച്ച കളിക്കാരനായ ഡിവില്ലിയേഴ്‌സ് താൻ കണ്ടതിൽവെച്ച് ഏറ്റവും കൂടുതൽ പ്രചോദനം നൽകുന്ന വ്യക്തിത്വത്തിനുടമയാണെന്ന് വിരാട് കൊഹ്ലി പറഞ്ഞു. ആർസിബിയ്‌ക്കായി നൽകിയ സമ്മാനങ്ങളെയോർത്ത് എന്നും നിങ്ങൾക്ക് അഭിമാനിക്കാം. ക്രിക്കറ്റിനും അതീതമാണ് നമ്മുടെ സൗഹൃദം. എല്ലാക്കാലത്തും അത് തുടരുമെന്നും കൊഹ്ലി ട്വീറ്റ് ചെയ്തു.
വിരമിക്കൽ പ്രഖ്യാപനം തന്റെ ഹൃദയത്തെ വേദനിപ്പിക്കുന്നു. എങ്കിലും നിങ്ങൾ മികച്ച തീരുമാനമാണ് എടുത്തതെന്ന് അറിയാം. നിങ്ങളെ ഒരുപാട് സ്‌നേഹിക്കുന്നുവെന്നും കൊഹ്ലി കൂട്ടിച്ചേർത്തു.
താൻ കണ്ടതിൽവെച്ച് ഏറ്റവും മികച്ച ക്രിക്കറ്റ് താരമാണ് എ ബി ഡിവില്ലിയേഴ്‌സെന്ന് അനുഷ്‌ക ഇൻസ്റ്റഗ്രാമിൽ കുറിച്ചു. നിങ്ങൾക്കും, ഭാര്യയ്‌ക്കും, കുഞ്ഞുങ്ങൾക്കും നല്ലൊരു ഭാവി ആശംസിക്കുന്നു. ഏറ്റവും മികച്ചതിന് മാത്രം അർഹരായവരാണ് നിങ്ങൾ. എല്ലാറ്റിലുമുപരി ഈ തീരുമാനം ഹൃദയഭേദകമാണെന്നും അനുഷ്‌ക പറഞ്ഞു.
Comments