ന്യൂഡെൽഹി : ലെയ്സ് പൊട്ടറ്റോ ചിപ്‌സിനായി മാത്രമുള്ള ഉരുളക്കിഴങ്ങിന്റെ പേറ്റന്റ് പെപ്സികോയ്‌ക്ക് നൽകിയ നടപടി റദ്ദാക്കി . പ്രൊട്ടക്ഷൻ ഓഫ് പ്ലാന്റ് വെറൈറ്റീസ് ആൻഡ് ഫാർമേഴ്‌സ് റൈറ്റ്‌സ് (പിപിവിഎഫ്ആർ) അതോറിറ്റി പുറപ്പെടുവിച്ച ഉത്തരവിലാണ് ഇക്കാര്യം വ്യക്തമാക്കിയിരിക്കുന്നത് .ഇത് ഇന്ത്യയിലെ കർഷകരുടെ ചരിത്ര വിജയമാണെന്നും . ഇന്ത്യയിലെ കർഷകർക്ക് നിയമപരമായി അനുവദിച്ചിട്ടുള്ള വിത്ത് സ്വാതന്ത്ര്യം ലംഘിക്കുന്നതിൽ നിന്ന് തടയാൻ ഇതിനു സാധിക്കുമെന്ന് രജിസ്ട്രേഷൻ റദ്ദാക്കാൻ ഹർജി നൽകിയ അലയൻസ് ഫോർ സസ്‌റ്റെയ്‌നബിൾ ആൻഡ് ഹോളിസ്റ്റിക് അഗ്രികൾച്ചറിന്റെ കൺവീനർ കവിത കുറുഗന്തി പറഞ്ഞു. എഫ് എൽ -2027 ഉരുളക്കിഴങ്ങിന്റെ പേറ്റന്റാണ് റദ്ദാക്കിയിരിക്കുന്നത് .
ഉത്തരവ് അവലോകനം ചെയ്യുകയാണെന്ന് പെപ്‌സികോ അറിയിച്ചു. ഈ ഉരുളക്കിഴങ്ങ് ഇനം കൃഷി ചെയ്തതിന് ഗുജറാത്ത് ആസ്ഥാനമായുള്ള ചില ഇന്ത്യൻ കർഷകർക്കെതിരെ പെപ്‌സികോ കേസ് നൽകിയിരുന്നു . നാല് ചെറുകിട കർഷകർക്കെതിരെ 4.2 കോടി രൂപ നഷ്ടപരിഹാരം ആവശ്യപ്പെട്ടാണ് കേസ് നൽകിയത് . അതേ വർഷം തന്നെ കേസ് പിൻവലിച്ചുകൊണ്ട്, പ്രശ്നം രമ്യമായി പരിഹരിക്കാൻ ആഗ്രഹിക്കുന്നുവെന്നും കമ്പനി പറഞ്ഞിരുന്നു .തുടർന്നാണ് പെപ്സികോയ്‌ക്ക് നൽകിയ പേറ്റന്റ് റദ്ദാക്കണമെന്ന് ആവശ്യപ്പെട്ട് കവിത കുറുഗന്തി നിയമനടപടികൾ ആരംഭിച്ചത് .
