ന്യൂഡൽഹി:രാജ്യത്തെ അതിശക്തരായ ദമ്പതിമാരുടെ പട്ടിക പുറത്ത്.ശതകോടീശ്വരനും പ്രമുഖ വ്യവസായിയുമായ മുകേഷ് അംബാനിയും ഭാര്യ നിതാ അംബാനിയുമാണ് ഒന്നാം സ്ഥാനത്ത്.ഇന്ത്യൻ ഇൻസ്റ്റിറ്റ്യൂട്ട് ഓഫ് ഹ്യുമൻ ബ്രാൻഡ്സ് നടത്തിയ ഈ വർഷത്തെ അതി ശക്തരായ ദമ്പതികളുടെ റാങ്കിംഗിലാണ് ഇരുവരും ഒന്നാമതെത്തിയത്.
റിലയൻസ് ഗ്രൂപ്പ് ചെയർമാനായ മുകേഷ് അംബാനിയും നിതയും 94% സ്കോറോടെയാണ് ഒന്നാം സ്ഥാനത്തെത്തിയത്. 86% സ്കോറോടെ ദീപിക പദുക്കോണും രൺവീർ സിംഗുമാണ് രണ്ടാം സ്ഥാനത്ത്. വിരാട് കോഹ്ലിയും ഭാര്യ അനുഷ്ക ശർമ്മയും 79 ശതമാനം സ്കോർ നേടി റാങ്കിംഗിൽ മൂന്നാം സ്ഥാനവും കരസ്ഥമാക്കി.സർവ്വേയിൽ ഒമ്പതാം സ്ഥാനത്താണ് കത്രീന കൈഫും വിക്കി കൗശലും.
മുൻ വർഷങ്ങളിലെ സർവ്വേകളിൽ ബിസിനസ്സ് രംഗത്തുള്ളവരെ ഉൾപ്പെടുത്തിയായിരുന്നില്ല. എന്നാൽ ഇത്തവണ എല്ലാ മേഖലയിൽ നിന്നുള്ളവരുടെയും പ്രാതിനിധ്യം ഉറപ്പിക്കണമെന്ന തീരുമാനത്തിന്റെ അടിസ്ഥാനത്തിലാണ് പട്ടിക തയ്യാറാക്കിയതെന്ന് ഇന്ത്യൻ ഇൻസ്റ്റിറ്റ്യൂട്ട് ഓഫ് ഹ്യൂമൻ ബ്രാൻഡ്സ് വ്യക്തമാക്കി.കൊറോണപ്രതിസന്ധിയെ തുടർന്ന് 2020ൽ സർവ്വേ നടത്തിയിരുന്നില്ല. 2021 ലെ റാങ്കിംഗിൽ ബിസിനസ്സ് ദമ്പതികളെയും ഉൾപ്പെടുത്തിയതോടെയാണ് അംബാനി ദമ്പതികൾ മുന്നിലെത്തിയത്.25 മുതൽ 40 വയസ് വരെ പ്രായമുള്ള 1,362 പേർക്കിടയിലാണ് സർവ്വേ സംഘടിപ്പിച്ചത്.
