ലോകത്ത് ഏറ്റവുമധികം ആളുകൾ ഉപയോഗിക്കുന്ന സമൂഹമാദ്ധ്യമങ്ങളിൽ ഒന്നാണ് മെറ്റാ ഉടമസ്ഥതയിലുള്ള വാട്ട്സ്ആപ്പ്.പുതിയ സ്വകാര്യതാ ഫീച്ചർ അവതരിപ്പിച്ചിരിക്കുകയാണ് വാട്സ്ആപ്പ് ഇപ്പോൾ.ഉപയോക്താവ് അറിയാതെ ഒളിഞ്ഞിരുന്ന് സ്റ്റാറ്റസ് കാണുന്നതും അവസാനമായി വാട്സാപ്പിൽ വന്ന സമയം പോലുള്ള വിശദാംശങ്ങൾ രഹസ്യമായി പിന്തുടരുന്നവരെയും തടയുന്നതാണ് വാട്സ്ആപ്പിലെ പുതിയ ഫീച്ചർ.
പുതിയ ഫീച്ചർ പ്രകാരം ഒളിഞ്ഞിരുന്ന് വീക്ഷിക്കുന്നവരെക്കുറിച്ച് ഭയപ്പെടാതെ ചാറ്റ് ചെയ്യുകയും സ്റ്റാറ്റസ് ഇടുകയും ചെയ്യാമെന്ന് കമ്പനി ഉറപ്പ് നൽകുന്നുണ്ട്.ഉപയാക്താക്കൾക്ക് അവരുടെ ലാസ്റ്റ് സീൻ ഓപ്ഷനും ഓൺലൈൻ പ്രവർത്തനങ്ങളും എല്ലാവരിൽ നിന്നും അല്ലെങ്കിൽ കോൺടാക്റ്റ് ലിസ്റ്റിൽ ഇല്ലാത്തവരിൽ നിന്നും മറയ്ക്കാനുള്ള ഓപ്ഷൻ നേരത്തെ തന്നെ വാട്സാപ് നൽകിയിരുന്നു.
എന്നാൽ ഒരാളുടെ വാട്സാപ് പ്രവർത്തനങ്ങളെ പുറത്തിരുന്ന് രഹസ്യമായി നിരീക്ഷിക്കാൻ കഴിയുന്ന ചില ആപ്പുകളും ലഭ്യമായിരുന്നു.ഇത് സ്വകാര്യതയ്ക്ക് വലിയ ഭീഷണി ഉയർത്തുവെന്ന് ആരോപണം ഉയർന്നിരുന്നു.
ബിസിനസ് അക്കൗണ്ടുകൾ ഉൾപ്പെടെ എല്ലാ വാട്സാപ് ഉപയോക്താക്കൾക്കും പുതിയ സ്വകാര്യതാ ഫീച്ചറുകൾ ഇപ്പോൾ ഫലപ്രദമാണ് എന്നാണ് റിപ്പോർട്ട്. ഒരു ഉപയോക്താവിന്റെ ഓൺലൈൻ സ്റ്റാറ്റസ് ആർക്കൊക്കെ കാണാനാകുമെന്നോ കാണാനാകുന്നില്ലെന്നോ എന്നത് തീരുമാനിക്കുന്നതാണ് പുതിയ ഫീച്ചർ. ഈ സ്വകാര്യതാ ക്രമീകരണങ്ങൾ സ്വയമേവ പ്രവർത്തിക്കുന്നതാണ്.
വാട്സ്ആപ്പിന്റെ ബാക്ക്എൻഡ് വഴിയാണ് ഫീച്ചർ ആക്ടിവേറ്റ് ചെയ്തിരിക്കുന്നത്.പുതിയ ഫീച്ചർ ആക്ടീവേറ്റ് ചെയ്യാൻ ഉപയോക്താക്കൾ ഒന്നും ചെയ്യേണ്ടതില്ല എന്നാണ് റിപ്പോർട്ട്
