മസ്കറ്റ്/ന്യൂഡൽഹി: ഹോർമുസ് കടലിടുക്കിൽ നടന്ന ആക്രമണത്തിന് പിന്നാലെ കാണാതായ ഇന്ത്യൻ നാവികന്റെ മൃതദേഹം കണ്ടെത്തി. മഹാരാഷ്ട്രയിലെ പൂനെ സ്വദേശിയായ ഹെറാം കർമാർക്കർ (30) ആണ് മരിച്ചതായി അധികൃതർ സ്ഥിരീകരിച്ചത്. ഒമാൻ കടലിൽ ദിവസങ്ങളായി തുടരുന്ന തിരച്ചിലിനൊടുവിലാണ് മൃതദേഹം കണ്ടെത്തിയത്.
ജൂലൈ 12-ന് ഇറാനിയൻ ഉപരോധങ്ങൾ ലംഘിച്ച് ഹോർമുസ് കടലിടുക്കിലൂടെ സഞ്ചരിച്ചിരുന്ന സൈപ്രസ് പതാകയുള്ള GFS Galaxy എന്ന ചരക്കുകപ്പൽ ആക്രമിക്കപ്പെട്ടിരുന്നു. ആക്രമണത്തെ തുടർന്ന് കപ്പലിലുണ്ടായിരുന്ന 23 ജീവനക്കാർ കടലിലേക്ക് ചാടുകയായിരുന്നു. ഇവരിൽ 10 ഇന്ത്യൻ നാവികർ ഉൾപ്പെടെ 22 പേരെ സുരക്ഷിതമായി രക്ഷപ്പെടുത്തിയെങ്കിലും ഹെറാം കർമാർക്കറെ കാണാതായിരുന്നു.
ഇതിനിടെ, ഹോർമുസ് കടലിടുക്കിൽ സുരക്ഷാ സാഹചര്യം കൂടുതൽ വഷളായിരിക്കുകയാണ്. കഴിഞ്ഞ ദിവസം ഒമാൻ കടൽ വഴി സഞ്ചരിച്ചിരുന്ന രണ്ട് എമിറാത്തി കപ്പലുകൾക്കും നേരെ ആക്രമണമുണ്ടായി. ആ സംഭവത്തിൽ മറ്റൊരു ഇന്ത്യൻ നാവികനും കൊല്ലപ്പെട്ടതായി റിപ്പോർട്ടുകളുണ്ട്.
തുടർച്ചയായ ആക്രമണങ്ങളുടെ പശ്ചാത്തലത്തിൽ ഹോർമുസ് വഴി സഞ്ചരിക്കുന്ന കപ്പലുകളിൽ ഇന്ത്യൻ നാവികരെ ഇനി നിയമിക്കരുതെന്ന് ഇന്ത്യ കപ്പൽ കമ്പനികൾക്കും റിക്രൂട്ട്മെന്റ് ഏജൻസികൾക്കും നിർദേശം നൽകിയിട്ടുണ്ട്. ഇന്ത്യൻ നാവികരുടെ സുരക്ഷ ഉറപ്പാക്കാൻ കേന്ദ്ര സർക്കാർ അടിയന്തര നടപടികൾ ശക്തമാക്കിയിരിക്കുകയാണ്.
