ന്യൂഡല്‍ഹി: ഡല്‍ഹിയില്‍ നാലുപേര്‍ക്കു കൂടി ഒമിക്രോണ്‍ സ്ഥിരീകരിച്ചെങ്കിലും സമൂഹവ്യാപനം നടന്നിട്ടില്ലെന്ന് ആരോഗ്യമന്ത്രി സത്യേന്ദ്രകുമാര്‍ ജയിന്‍ പറഞ്ഞു. ഇവര്‍ വിദേശരാജ്യങ്ങളില്‍ നിന്ന് എത്തിയവരാണെന്നും അദ്ദേഹം പറഞ്ഞു. ഇതുവരെ സമൂഹവ്യാപനം സ്ഥിരീകരിച്ചി്ട്ടില്ല ഏതുസാഹചര്യത്തെയും നേരിടാന്‍ തലസ്ഥാന നഗരി സജ്ജമാണെന്നും അദ്ദേഹം പറഞ്ഞു.
ആറു പേര്‍ക്കാണ് ഇതുവരെയായി രോഗം സ്ഥിരീകരിച്ചത്. ഒരാള്‍ രോഗമുക്തി നേടി. റാഞ്ചി സ്വദേശിയായ 37 കാരനാണ് രോഗമുക്തി നേടിയത്. ഇയാള്‍ ടാന്‍സാനിയയില്‍ നിന്നു ദോഹവഴി ഡല്‍ഹിയില്‍ എത്തിയതാണ്. ഡിസംബര്‍ രണ്ടിന് ഖത്തര്‍ എയര്‍വേയ്‌സിലാണ് നാട്ടിലെത്തിയത്. ജോഹനാസ് ബര്‍ഗില്‍ ഒരാഴ്ചയോളം കഴിഞ്ഞ ഇയാള്‍ക്ക് നേരിയതോതില്‍ രോഗലക്ഷണം പ്രകമായിരുന്നു.
വിദേശരാജ്യത്ത് നിന്ന് എത്തിയ ഇവരെ എയര്‍പോര്‍ട്ടില്‍ നിന്നു തന്നെ ലോക്‌നായ്ക് ജയപ്രകാശ് നാരായണന്‍ ആശുപത്രിയിലേക്ക് മാറ്റിയിരുന്നു. അഞ്ചുപേര്‍ ചികിത്സയിലാണ്.
നാട്ടിലെത്തിയ 74 യാത്രക്കാരെ ജയപ്രകാശ് നാരായണന്‍ ആശുപത്രിയിലേക്ക് മാറ്റുകയും ഇവരില്‍ ഒമിക്രോണ്‍ സംശയിക്കുന്നവരെ പ്രത്യേക വാര്‍ഡില്‍ ചികിത്സിക്കാനും സകര്യമൊരുക്കിയിട്ടുണ്ട്. ആശുപത്രിയില്‍ പ്രവേശിപ്പിച്ചവരില്‍ 36 പേരെ ഡിസ്ചാര്‍ജ്ജ് ചെയ്തു. 38 പേര്‍ ചികിത്സ തുടരുകയാണ്. കൊറോണ വൈറസിന്റെ ഏതൊരു വകഭേദവും സൃഷ്ടിക്കുന്ന അപകടാവസ്ഥയെ തരണം ചെയ്യാന്‍ സര്‍ക്കാര്‍ സജ്ജമാണെന്നും അദ്ദേഹം ഉറപ്പുനല്‍കി.
രോഗവ്യാപനം തടയാന്‍ വിദേശത്തു നിന്നെത്തുന്ന യാത്രക്കാര്‍ക്ക് ആര്‍ടിപിസിര്‍ ടെസ്റ്റ് നിര്‍ബന്ധമാക്കി രാജ്യം പുതിയ മാനദണ്ഡം കൊണ്ടുവന്നിട്ടുണ്ട്. നെഗറ്റീവ് സര്‍ട്ടിഫിക്കറ്റ് ഉള്ളവര്‍ക്ക് മാത്രമാണ് വിമാനത്താവളത്തിനു പുറത്തേക്കുള്ള യാത്രയ്‌ക്ക് അനുമതിയുള്ളൂ.
Comments