ദ്വിദിന സന്ദർശനത്തിനായി അമിത് ഷാ മഹാരാഷ്‌ട്രയിൽ; വിവിധ വികസന പദ്ധതികൾ ഇന്ന് ഉദ്ഘാടനം ചെയ്യും

ന്യൂഡൽഹി: ദ്വിദിന സന്ദർശനത്തിനായി കേന്ദ്ര ആഭ്യന്തരമന്ത്രി അമിത് ഷാ ഇന്ന് മഹാരാഷ്‌ട്രയിലെത്തും. സന്ദർശനത്തിന്റെ ഭാഗമായി വിവിധ പൊതു പരിപാടികളിൽ അദ്ദേഹം പങ്കെടുക്കും. കൂടാതെ, പുതുതായി നിർമ്മിച്ച കേന്ദ്ര ഫോറൻസിക് സയൻസ് ലാബ്(സിഎഫ്എസ്എൽ) ആഭ്യന്തരമന്ത്രി നാടിന് സമർപ്പിക്കും.

ഇന്ന് രാവിലെ മഹാരാഷ്‌ട്രയിൽ എത്തുന്ന അമിത് ഷാ, ഷിർദ്ദി സായ് ക്ഷേത്രത്തിൽ ദർശനം നടത്തും. രാവിലെ 11 മണിയോടെ അദ്ദേഹം ക്ഷേത്രത്തിലെത്തും എന്ന് ആഭ്യന്തരമന്ത്രാലയം അറിയിച്ചു. തുടർന്ന് പത്മശ്രീ ഡോ വിടൽറാവു വിഖെ പാട്ടീൽ സാഹിത്യ അവാർഡ് വിതരണത്തിലും, സഹകരണ കൗൺസിൽ സമ്മേളനത്തിലും മഹാരാഷ്‌ട്രയിലെ ലോനി മേഖലയിൽ ഉച്ചയ്‌ക്ക് നടക്കുന്ന സഹകാർ പരിഷത്ത് സമ്മേളനത്തിലും ഷാ പങ്കെടുക്കും. ഇന്ന് വൈകിട്ടോടുകൂടി മുംബൈയിലെത്തുന്ന മന്ത്രി, അവിടെ നടക്കുന്ന ഇൻസ്റ്റിറ്റ്യൂട്ട് ഓഫ് കമ്പനി സെക്രട്ടറീസ് ഓഫ് ഇന്ത്യ (ഐസിഎസ്‌ഐ) ദേശീയ അവാർഡ് വിതരണ ചടങ്ങിൽ പങ്കെടുക്കും.

സന്ദർശനത്തിന്റെ രണ്ടാം ദിനമായ നാളെ, അമിത് ഷാ ശ്രീമന്ത് ദഗ്ദുഷേത് ഗണപതി ക്ഷേത്ര ദർശനത്തിനെത്തും. തുടർന്ന്, പൂനെയിലെ വിവിധ പൊതു പരിപാടികളിൽ ആഭ്യന്തരമന്ത്രി രാജ്യത്തെ അഭിസംബോധന ചെയ്യും. നാളെ 11 മണിക്ക് പൂനെയിലെ സിഎഫ്എസ്എൽ ക്യാമ്പസ് അദ്ദേഹം നാടിന് സമർപ്പിക്കും. പൂനെയിൽ സൈനികർക്കൊപ്പം ഉച്ചഭക്ഷണത്തിന് ശേഷം, മറ്റ് പൊതു പരിപാടികളിൽ അദ്ദേഹം പങ്കെടുക്കും. ഉച്ചകഴിഞ്ഞ് പൂനെ മുനിസിപ്പൽ കോർപ്പറേഷനിൽ ഛത്രപതി ശിവജി മഹാരാജിന്റെയും ബാബാസാഹെബ് അംബേദ്കറിന്റെയും പ്രതിമയുടെ ശിലാസ്ഥാപന ചടങ്ങിൽ ആഭ്യന്തരമന്ത്രി പങ്കെടുക്കും.