കോഴിക്കോട്: ഗുണ്ടകളുടെ കയ്യിൽ നിന്ന് പോലീസിനെ രക്ഷിക്കാൻ കഴിയാത്ത പിണറായിയാണ് മറ്റുള്ളവരെ ഭയപ്പെടുത്തുന്നതെന്ന് കെ മുരളീധരൻ. അഥിതി ദേവോ ഭവ എന്നു പറഞ്ഞാൽ അതിഥികളിൽ നിന്ന് തല്ലുവാങ്ങുക എന്നല്ലെന്നും ലഹരിമാഫിയ കേരളത്തിൽ പടർന്നു പിടിച്ചതിന്റെ തെളിവാണ് പോലീസുകാർക്ക് നേരിട്ട അനുഭവമെന്നും കെ. മുരളീധരൻ പറഞ്ഞു. കോഴിക്കോട് കെ. കരുണാകരൻ അനുസ്മരണത്തിൽ സംസാരിക്കുകയായിരുന്നു അദ്ദേഹം.
യഥാർത്ഥ വികസനം എന്തെന്ന് കേരളത്തെ കാണിച്ചു തന്ന ഭരണാധികാരിയാണ് കെ കരുണാകരൻ. ജനങ്ങളെ കൂടെ നിർത്തിയുള്ള വികസനമാണ് അദ്ദേഹം നടത്തിയത്.
കമ്മീഷൻ പറ്റിയുള്ള വികസനം ആയിരുന്നില്ല.
നെടുമ്പാശ്ശേരി വിമാനത്താവളത്തിന് കരുണാകരന്റെ പേരിടാൻ കോൺഗ്രസ് അധികാരത്തിൽ ഇരുന്നപ്പോഴും ശ്രമിച്ചില്ല. കെ റെയിൽ പൂർത്തിയാകുമ്പോഴേക്കും കമ്മ്യുണിസ്റ്റ് പാർട്ടി കേരളത്തിൽ ഉണ്ടാവുമോയെന്നും കെ. മുരളീധരൻ പരിഹസിച്ചു. കെ റെയിൽ വിഷയത്തിൽ ശശി തരൂർ പാർട്ടിക്കൊപ്പം നിൽക്കണം. പ്രതിസന്ധി ഘട്ടത്തിൽ ശശി തരൂരിനൊപ്പം പാർട്ടി നിന്നിട്ടുണ്ടെന്നും മുരളീധരൻ കൂട്ടിച്ചേർത്തു.
Comments