തങ്ങളുടെ ഉൽപ്പന്നങ്ങൾ വിറ്റഴിക്കാൻ പടിച്ച പണി പതിനെട്ടും പയറ്റുന്നവരാണ് കമ്പനികൾ.പരസ്യങ്ങൾ ആളുകളെ വളരെയധികം സ്വാധീനിക്കുന്നതിനാൽ പരസ്യങ്ങളിലാണിപ്പോൾ പരീക്ഷണങ്ങളധികവും നടത്താറ്. അത്തരമൊരു പരസ്യമാണ് ഇപ്പോൾ സമൂഹമാദ്ധ്യമങ്ങളിൽ വൈറലാവുന്നത്.
‘ഉയരമുള്ള, വെളുത്ത നിറമുള്ള സുന്ദരനായ യുവാവ്, വയസ് 24. എന്റെ പ്രിയപുത്രൻ മജ്നുവിനെ കാണാനില്ല. ദയവായി വീട്ടിലേയ്‌ക്ക് തിരിച്ച് വരൂ. എല്ലാവരും വളരെ ദുഃഖത്തിലാണ്. ലൈലയെ വിവാഹം ചെയ്യണമെന്നും വിവാഹത്തിനുള്ള ഷെർവാണി സുൽത്താനിൽനിന്നു വാങ്ങണമെന്നുമുള്ള നിന്റെ ആവശ്യങ്ങൾ ഞങ്ങൾ അംഗീകരിക്കുന്നു. പാർക്കിങ് സൗകര്യമുള്ള അവരുടെ ന്യൂ മാർക്കറ്റ് ബ്രാഞ്ചിൽ നമുക്ക് പോകാം. വിവാഹസത്കാരത്തിൽ നമ്മുടെ എല്ലാ കുടുംബാംഗങ്ങളും നിന്റെ അടുത്ത സുഹൃത്തുക്കളും സുൽത്താനിൽ നിന്നുള്ള കുർത്ത ധരിക്കാമെന്നാണു തീരുമാനിച്ചിരിക്കുന്നത്. കാണാതായ ആരെയെങ്കിലും കണ്ടെത്താനുള്ള പരസ്യമാണ് ഇതെന്ന് കരുതിയെങ്കിൽ തെറ്റി. കൊൽക്കത്തയിലെ പ്രമുഖ ഷെർവാണി നിർമ്മാതാക്കളായ സുൽത്താൻ കമ്പനിയുടെ പരസ്യമാണിത്.
ഷെർവാണി ധരിച്ച ഒരു യുവാവിന്റെ ചിത്രത്തിനൊപ്പമാണ് കുറിപ്പ് പങ്കുവെച്ചിരിക്കുന്നത്. രസകരമായ ഈ പത്രപരസ്യത്തിന്റെ ചിത്രം സമൂഹമാധ്യമങ്ങളിൽ വൈറലായിരിക്കുകയാണ്. പരസ്യത്തിന്റെ പിന്നണിയിൽ പ്രവർത്തിച്ചിരിക്കുന്നവരെ അഭിനന്ദിച്ച് നിരവധിപ്പേർ രംഗത്തെത്തുകയും ചെയ്തു.
