കോട്ടയം: മഹാപ്രളയം സംഹാര താണ്ഡവമാടിയ കൊക്കയാറിൽ കിടപ്പാടം നഷ്ടപ്പെട്ടവർക്ക് വീട് നിർമ്മിച്ച് നൽകുന്ന പദ്ധതിയ്‌ക്ക് സേവാഭാരതി തുടക്കം കുറിച്ചു. ആദ്യ വീടിന്റെ ശിലാസ്ഥാപനം കൊക്കയാർ പഞ്ചായത്തിലെ കനകപുരം വാർഡിൽ നടന്നു. ആർഎസ്എസ് പ്രന്തീയ സേവാപ്രമുഖ് എംസി വത്സൻ ശിലാസ്ഥാപനം നിർവഹിച്ചു. പ്രാന്തീയ സമ്പർക്ക പ്രമുഖ് കെബി ശ്രീകുമാർ, കാര്യകാരി സദസ്യൻ ടിഎസ് നാരായണൻ, സേവാഭാരതി ജില്ലാ വൈസ് പ്രസിഡണ്ട് ഡി പ്രസാദ് എന്നിവർ പങ്കെടുത്തു.
പ്രളയം ദുരിതം വിതച്ച മുണ്ടക്കയം, കൂട്ടിക്കൽ, പെരുവന്താനം എന്നിവിടങ്ങളിലായി 20 തോളം വീടുകളാണ് സേവാഭാരതി തലചായ്‌ക്കാനൊരിടം പദ്ധതിയുടെ ഭാഗമായി നിർമ്മിക്കുന്നത്. ജില്ലയിലെ മലയോര മേഖലയിൽ പ്രകൃതി കലിതുള്ളിയിട്ട് മൂന്ന് മാസം പിന്നിടുമ്പോഴും ദുരിത ബാധിതർക്ക് കൈത്താങ്ങായി സേവനപ്രവർത്തനങ്ങളുമായി സേവാഭാരതി ഇപ്പോഴും സജീവമാണ്. പ്രളയാനന്തരം വിപുലമായ സേവനപ്രവർത്തനങ്ങളാണ് സേവാഭാരതി പ്രദേശത്ത് നടത്തിക്കൊണ്ടിരിക്കുകയാണ്.
ആദ്യഘട്ടത്തിൽ ശുചീകരണ പ്രവർത്തനങ്ങളും, നിത്യാപയോഗ സാമഗ്രികളുടെ വിതരണവുമായി ദുരന്തഭൂമിയിൽ സാന്നിദ്ധ്യമായി മാറിയ സേവാഭാരതി ദുരിതാശ്വാസ ക്യാമ്പിലും മറ്റു സ്ഥലങ്ങളിലും കഴിയുന്നവർക്ക് വസ്ത്രങ്ങളും ഭക്ഷണ പൊതികളും നിത്യേന എത്തിച്ചു നൽകി. തകർന്ന റോഡുകൾ സഞ്ചാരയോഗ്യമാക്കിയും താൽകാലികമായി 3 പാലങ്ങൾ നിർമ്മിച്ചും സേവാദൗത്യം തുടർന്നു.
800 വീടുകളും, 450 സ്ഥാപനങ്ങും ശുചീകരിച്ചു. പുനരധിവാസ കിറ്റുകളും പഠനോപകരണങ്ങളും വിതരണം ചെയ്തു. ദുരന്തത്തിൽ ഉറ്റ ബന്ധുക്കളെ നഷ്ടപ്പെട്ട ഏഴ് കുടുംബങ്ങൾക്ക് മരണാനന്തര സഹായം നൽകിയിട്ടുണ്ട്. ഭാഗികമായി കേട് സംഭവിച്ച വിടുകളുടെ അറ്റകുറ്റ പണികളും സംഘടനയുടെ നേതൃത്വത്തിൽ പുരോഗമിക്കുകയാണ്.
Comments