തിരുവനന്തപുരം; ചികിത്സയ്ക്കായി വിദേശത്ത് പോയ മുഖ്യമന്ത്രി പിണറായി വിജയന്റെ ആരോഗ്യനില തൃപ്തികരമെന്ന് വിവരം. തന്റെ ആരോഗ്യസ്ഥിതി സംബന്ധിച്ച കാര്യങ്ങൾ മന്ത്രിസഭാ യോഗത്തിൽ മുഖ്യമന്ത്രി വിശദീകരിച്ചു. ആരോഗ്യ സ്ഥിതി തൃപ്തികരമാണെന്നും ചികിത്സ നന്നായി മുന്നോട്ടു പോകുന്നുവെന്നും മുഖ്യമന്ത്രി പറഞ്ഞു. -9 ഡിഗ്രിയാണ് പ്രദേശത്തെ കാലാവസ്ഥ. എങ്കിലും അത് ആശുപത്രിയെ ബാധിക്കുന്നില്ലെന്നും മുഖ്യമന്ത്രി വ്യക്തമാക്കി.
ആദ്യമായാണ് സംസ്ഥാനത്തെ മുഖ്യമന്ത്രി വിദേശത്ത് നിന്ന് മന്ത്രിസഭാ യോഗത്തിൽ പങ്കെടുക്കുന്നത്. വിദേശത്താണെങ്കിലും മുഖ്യമന്ത്രിയുടെ ചുമതല ആർക്കും കൈമാറിയിരുന്നില്ല. നിലവിൽ അമേരിക്കയിലെ മിനസോട്ടയിലെ മയോ ക്ലിനിക്കിലാണ് മുഖ്യമന്ത്രിക്ക് ചികിത്സ. ജനുവരി 15നാണ് ചികിത്സയ്ക്കായി മുഖ്യമന്ത്രി അമേരിക്കയിലേക്ക് പോയത്. 29ന് മടങ്ങിയെത്തുമെന്നാണ് വിവരം. ഭാര്യ കമലയാണ് അദ്ദേഹത്തിനൊപ്പമുള്ളത്.
സർക്കാർ ചെലവിലാണ് മുഖ്യമന്ത്രിയുടെ ചികിത്സ. ഇതിന് മുൻപ് 2018 സെപ്റ്റംബറിലും മുഖ്യമന്ത്രി അമേരിക്കയിൽ ചികിത്സ നടത്തിയിരുന്നു. അന്നും മുഖ്യമന്ത്രിയുടെ അധികാരം മറ്റാർക്കും നൽകാതെ ഇ-ഫയലിംഗ് വഴിയാണ് അദ്ദേഹം ഭരണകാര്യങ്ങൾ നോക്കി നടത്തിയത്.
