കഴിവ് തിരിച്ചറിഞ്ഞതു കൊണ്ടാണ് ജോലി ലഭിച്ചത് ; താലി പൊട്ടിയ ഭാര്യയാണ് താൻ , ദ്രോഹിക്കരുതെന്ന് സ്വപ്ന സുരേഷ്

കൊച്ചി : ഹൈറേഞ്ച് റൂറല്‍ ഡെവലപ്‌മെന്റ് സൊസൈറ്റിയിലെ നിയമനവുമായി ബന്ധപ്പെട്ട വിവാദത്തെ കുറിച്ച് ഒന്നുമറിയില്ലെന്ന് സ്വപ്‌ന സുരേഷ്. സ്ഥാപനത്തിന്റെ ഡയറക്ടര്‍ ബോര്‍ഡ് ചര്‍ച്ച ചെയ്താണ് നിയമനം നടത്തിയത്. സ്ഥാപനം ഒരു അംഗീകൃത എന്‍ജിഒ ആണ് . താന്‍ ഇപ്പോള്‍ ആ സ്ഥാപനത്തിലെ ജോലിക്കാരി ആണ്. എച്ച്ആര്‍ഡിഎസുമായി തനിക്ക് നേരത്തെ ഒരു ബന്ധമുണ്ടായിരുന്നില്ലെന്നും സ്വപ്‌ന സുരേഷ് പറഞ്ഞു.

‘ ഞാനൊരു സ്ത്രീ ആണ്, ദുഃഖിക്കുന്ന ഒരമ്മയാണ്. താലി പൊട്ടിയ ഭാര്യയാണ്. ജോലി സ്ഥലത്തും ചൂഷണം ചെയ്യപ്പെട്ടിട്ടുണ്ട്. രാഷ്‌ട്രീയത്തെക്കുറിച്ച് എനിക്ക് ഒന്നുമറിയില്ല. സ്ഥാപനത്തിന് രാഷ്‌ട്രീയബന്ധമുണ്ടോ എന്നും അറിയില്ല. എന്റെ നിയമനത്തിലേക്ക് എന്തിനാണ് രാഷ്‌ട്രീയം വലിച്ചിടുന്നത്? ജോലിക്ക് വേണ്ടി ഒരുപാട് പേരെ ഞാൻ സമീപിച്ചു . എന്നാൽ എനിക്ക് ജോലി തരുന്നതിന് പേടിയാണെന്നാണ് പലരും പറഞ്ഞത്. കേസിലുള്‍പ്പെട്ട പലരും പലസ്ഥാപനങ്ങളില്‍ ജോലിയില്‍ തുടരുകയാണ്. എന്തുകൊണ്ട് എനിക്ക് മാത്രം അത് പറ്റില്ല.

അനില്‍ എന്ന സുഹൃത്ത് വഴിയാണ് എച്ച്.ആര്‍.ഡി.എസിലെ ജോലിക്ക് അവസരം ലഭിച്ചത്. യോഗ്യതയ്‌ക്കപ്പുറം പ്രതിസന്ധി ഘട്ടത്തില്‍ ലഭിച്ച സഹായം കൂടിയാണ് ഈ ജോലി. ഫോണിലൂടെ രണ്ട് തവണ അഭിമുഖങ്ങള്‍ കഴിഞ്ഞതിനു ശേഷമാണ് താന്‍ ജോലിയില്‍ പ്രവേശിച്ചത്.

സ്ഥാപനത്തിലെ സ്ത്രീ ശാക്തികരണ വിഭാഗം ഡയറക്ടര്‍ ആയാണ് എനിക്ക് ചുമതല. ഇതുപോലൊരു സ്ത്രീക്ക് സമൂഹത്തിലെ സ്ത്രീകളുടെ പലപ്രശ്‌നങ്ങളും മനസ്സിലാക്കാന്‍ സാധിക്കും, അവരെ സഹായിക്കാന്‍ പറ്റുമെന്ന് എനിക്ക് ഉറപ്പുണ്ട്. വരുമാനം ഉണ്ടായാലേ മക്കളുടെ കാര്യങ്ങള്‍ നോക്കാന്‍ കഴിയൂ. കഴിവ് തിരിച്ചറിഞ്ഞതുകൊണ്ടാണ് ജോലി ലഭിച്ചത് . നിങ്ങള്‍ക്ക് എന്നെ കൊല്ലണമെങ്കില്‍ കൊല്ലൂ, അല്ലാതെ ഇങ്ങനെ ദ്രോഹിക്കരുത്. ഞാനെന്റെ മക്കളെ ഒന്ന് വളര്‍ത്തിക്കോട്ടെ, ജീവിക്കാന്‍ അനുവദിക്കണം’, സ്വപ്ന സുരേഷ് പറഞ്ഞു.

എതിരേ വരുന്ന എന്തിനേയും നേരിടാമെന്നാണ് ഞാൻ ഇന്ന് കരുതുന്നത് . ഈ നാട്ടിലെ നിയമസംവിധാനത്തില്‍ വിശ്വാസമുണ്ട്,’ സ്വപ്‌ന സുരേഷ് പറഞ്ഞു .