ഇംഫാൽ : പ്രധാനമന്ത്രി നരേന്ദ്ര മോദിക്ക് ഊഷ്മള സ്വീകരണമൊരുക്കി മണിപ്പൂർ. തെരഞ്ഞെടുപ്പിന് മുന്നോടിയായുള്ള പ്രചാരണപരിപാടികളിൽ പങ്കെടുക്കാനാണ് പ്രധാനമന്ത്രി സംസ്ഥാനത്തെത്തിയത്. പ്രധാനമന്ത്രിയെ വരവേൽക്കാൻ ജനസാഗരമാണ് ഒഴുകിയെത്തിയത്.
പരിപാടിക്കെത്തിയ വനിതാ പ്രവർത്തകരുമായി കാറിൽ നിന്നിറങ്ങി മോദി സംവദിച്ചു. പ്രധാനമന്ത്രി ഭാരത് മാതാ കീ ജയ് വിളിച്ചതോടെ പ്രവർത്തകരും ഏറ്റുപിടിച്ചു. ‘മോദിജി കീ ജയ്’ ആരവങ്ങളാണ് അവിടെ നിന്നും ഉയർന്നത്. പ്രവർത്തകർക്ക് കൈ കൊടുക്കുകയും ചിത്രങ്ങൾ പകർത്താൻ അനുവദിക്കുകയും ചെയ്തു. ഈ വീഡിയോ നരേന്ദ്ര മോദി തന്നെ ട്വിറ്ററിൽ പങ്കുവെച്ചിട്ടുണ്ട്. നിമിഷ നേരം കൊണ്ടാണ് ഇത് സമൂഹമാദ്ധ്യമങ്ങളിൽ വൈറലായത്.
മണിപ്പൂരിൽ തുടർഭരണം ഉറപ്പിക്കാൻ ഒരുങ്ങിയിരിക്കുന്ന ബിജെപി സഖ്യം പൂർണ ആത്മവിശ്വാസത്തിലാണ്. സംസ്ഥാനത്തെ ഭിന്നിപ്പിച്ച കോൺഗ്രസിനെ ഇല്ലാതാക്കിക്കൊണ്ട് അധികാരം നിലനിർത്താനുള്ള തയ്യാറെടുപ്പിലാണ് പാർട്ടി.
