വാഹനപ്രേമികൾക്ക് ഒട്ടം ശുഭകരമല്ലാത്ത വാർത്തയാണ് ഫോക്സ് വാഗൺ ഇന്ത്യ പുറത്ത് വിട്ടിരിക്കുന്നത്. രാജ്യത്തെ വാഹനപ്രേമികളുടെ എക്കാലത്തെയും ജനപ്രിയ മോഡലുകളായ പോളോയുടെയും വെന്റോയുടെയും ഉത്പാദനം ഇന്ത്യയിൽ നിർത്തുന്നതായി ഫോക്സ് വാഗൺ ഇന്ത്യ അറിയിച്ചു. എന്നുമുതലാണ് ഉത്പാദനം നിർത്തുന്നത് എന്ന് സംബന്ധിച്ച വിവരങ്ങൾ നിർമ്മാതാക്കൾ പുറത്തുവിട്ടിട്ടില്ല. എന്നിരുന്നാലും വൈകാതെ ഈ രണ്ട് വാഹനങ്ങളുടെയും ഇന്ത്യയിലെ ഉത്പാദനം നിലയ്ക്കുമെന്നാണ് റിപ്പോർട്ട്.
മഹാരാഷ്ട്രയിലെ ചകനിലാണ് ഫോക്സ് വാഗണിന്റെ പോളോയും വെന്റോയും നിർമ്മിക്കുന്നത്. 2010 മുതലാണ് ഇവിടെ നിർമ്മിച്ച പോളോ ഇന്ത്യൻ നിരത്തിൽ കുതിപ്പ് തുടങ്ങിയത്. ഇതിനോടകം ധാരാളം ആരാധകരുള്ള പ്രീമിയം ഹാച്ച്ബാക്കാണ് ഫോക്സ് വാഗൺ പോളോ. അതിനാൽ തന്നെ ഉത്പാദനം നിർത്തുന്നു എന്ന വാർത്ത വാഹനപ്രേമികൾ ഞെട്ടലോടെയാണ് ഏറ്റെടുത്തത്.
എന്തുകൊണ്ടാണ് ഈ രണ്ട് മോഡലുകളുടെ ഉത്പാദനം നിർത്തുന്നതെന്ന് നിർമ്മാതാക്കൾ ഔദ്യോഗികമായി അറിയിച്ചിട്ടില്ല. വെന്റോയ്ക്ക് പകരക്കാരനായി ആണ് ഫോക്സ് വാഗണിന്റെ പുതിയ വാഹനം വിർറ്റസ് ഇന്ത്യയിൽ എത്തുന്നതെന്നാണ് റിപ്പോർട്ട്. അപ്പോഴും, പോളോയ്ക്ക് പകരം ഏത് പ്രീമിയം ഹാച്ച്ബാക്കാണ് എത്തുന്നത് എന്ന് ഇനിയും വ്യക്തമല്ല. കഴിഞ്ഞ കുറച്ച് നാളുകളായി പോളോയുടെ വിപണി കുറഞ്ഞതാകാം വാഹനത്തിന്റെ ഉത്പാദനം നിർത്താനുള്ള പ്രധാന കാരണമെന്നാണ് സൂചന.
ഉത്പാദനം നിർത്തുന്നത് സംബന്ധിച്ച കൂടുതൽ വിവരങ്ങൾ വരും ദിവസങ്ങളിൽ നിർമ്മാതാക്കൾ പുറത്തുവിടും. ഇതിന്റെ കാരണവും, നിലവിലുള്ള ഉപഭോക്താക്കളുടെ സംശയങ്ങൾക്കുള്ള ഉത്തരവും നിർമ്മാതാക്കൾ വൈകാതെ നൽകുമെന്നാണ് ഫോക്സ് വാഗൺ അറിയിച്ചിരിക്കുന്നത്.
English summary: Volkswagen Polo and Vento’s production to end soon
Comments