കണ്ണൂര്: എന്തുകിട്ടും എന്നതല്ല നിലപാടാണ് പ്രധാനമെന്ന് പി.ജയരാജന്. സിപിഎം സെക്രട്ടറിയറ്റില് ഇടംകിട്ടാതെ പോയതോടെ ജയരാജന് വേണ്ടി സമൂഹമാദ്ധ്യമങ്ങളില് വ്യാപക പ്രചാരണം ഉണ്ടായിരുന്നു. ഇതുമായി ബന്ധപ്പെട്ട ചോദ്യത്തോടായിരുന്നു ജയരാജന്റെ പ്രതികരണം. ഉള്പാര്ട്ടി ജനാധിപത്യമുള്ള പാര്ട്ടിയാണ് സിപിഎം. വിമര്ശനവും സ്വയം വിമര്ശനവും ഉള്ള ഏക പാര്ട്ടിയാണ് സിപിഎം.
തന്നെ തഴഞ്ഞോ എന്നാണ് മാദ്ധ്യമങ്ങള്ക്ക് അറിയേണ്ടിയിരുന്നത്. മാദ്ധ്യമങ്ങള്ക്ക് ഒളിഞ്ഞുനോട്ട മനോഭാവമാണുള്ളത്. സിപിഎമ്മില് ഉള്പാര്ട്ടി ജനാധിപത്യമുണ്ട്. കോണ്ഗ്രസില് അമ്മയും രണ്ട് മക്കളുമാണ് തീരുമാനമെടുക്കുന്നത്. സ്വന്തം സ്ഥാനത്തിന് വേണ്ടി ഗ്രൂപ്പ് മാറുന്നവരാണ് കോണ്ഗ്രസ് നേതാക്കള്. പൊതുപ്രവര്ത്തകര് എന്ന നിലയില് എന്ത് പദവി കിട്ടും എന്നതല്ല പ്രധാനം, നിലപാടുകളാണ് പ്രധാനമെന്നും ജയരാജന് പറയുന്നു.
സിപിഎം സംസ്ഥാന സെക്രട്ടറിയേറ്റില് ഇടംപിടിക്കാതെ പോയതിന് പിന്നാലെയാണ് പി. ജയരാജനെ അനുകൂലിച്ചുകൊണ്ട് സമൂഹമാധ്യമങ്ങളില് പ്രചാരണം നടക്കുന്നത്. 42,000 പേര് അംഗങ്ങളായുള്ള റെഡ് ആര്മി ഒഫീഷ്യല്സ് എന്ന ഫെയ്സ്ബുക്ക് പേജിലാണ് ജയരാജന് അനുകൂല പോസ്റ്ററുകള് പ്രത്യക്ഷപ്പെട്ടത്. ‘പി.ജയരാജന് ഇത്തവണ സെക്രട്ടേറിയറ്റില് ഇല്ല, പക്ഷേ ജനങ്ങളോടൊപ്പം ഉണ്ട്’, ‘സ്ഥാനമാനങ്ങളില് അല്ല, ജനഹൃദയങ്ങളിലാണ് സ്ഥാനം’ എന്നാണ് റെഡ് ആര്മി ഒഫീഷ്യല്സെന്ന പേജില് പ്രത്യക്ഷപ്പെട്ട പോസ്റ്ററുകളില് പറയുന്നത്.
കണ്ണൂരിന് താരകമല്ലോ എന്ന ജയരാജന് അനുകൂല വാഴ്ത്തുപ്പാട്ടും പേജില് പോസ്റ്റ് ചെയ്തിട്ടുണ്ട്. എട്ട് പുതുമുഖങ്ങള് ഉള്പ്പെടെ 17 അംഗ സെക്രട്ടേറിയറ്റിനാണ് സിപിഎം രൂപം കൊടുത്തിരിക്കുന്നത്. സീനിയറായ സംസ്ഥാന കമ്മിറ്റി അംഗങ്ങള്ക്കാണ് സംസ്ഥാന സെക്രട്ടേറിയറ്റ് രൂപീകരണത്തില് സാധാരണ മുന്ഗണന ലഭിക്കാറുള്ളത്. എന്നാല് ഇക്കുറി മുഹമ്മദ് റിയാസ് , എം.സ്വരാജ്, പി.കെ.ബിജു എന്നിവരെ ഉള്പ്പെടുത്തി ആ രീതിയ്ക്ക് മാറ്റം വരുത്തിയിട്ടുമുണ്ട്.
Comments