ഇടുക്കി: കെപിസിസി പ്രസിഡന്റ് കെ.സുധാകരനും ഇടുക്കി എംപി ഡീൻ കുര്യാക്കോസിനുമെതിരെ രൂക്ഷ വിമർശനവുമായി സിപിഎം ഇടുക്കി ജില്ലാ സെക്രട്ടറി സി.വി വർഗീസ്. സിൽവർ പദ്ധതി എതിർത്താൽ കെ.സുധാകരന്റെ നെഞ്ചത്ത് കൂടി കെ-റെയിൽ ഓടിച്ച് പദ്ധതി നടപ്പാക്കുമെന്നാണ് സി.വി വർഗീസ് പറഞ്ഞത്. കൂടാതെ, എസ്എഫ്‌ഐ നേതാവ് ധീരജിനെ കൊലപ്പെടുത്തിയ കേസിൽ അറസ്റ്റിലായ യൂത്ത് കോൺഗ്രസ് നേതാവ് നിഖിൽ പൈലിയ്ക്ക് സ്വീകരണം നൽകാൻ കോൺഗ്രസുകാർ പരലോകത്ത് പോകേണ്ടിവരുമെന്നും അദ്ദേഹം മുന്നറിയിപ്പ് നൽകി.
അതിവേഗ റെയിലിന്റെ കല്ല് പിഴുതെടുക്കാൻ ശ്രമിക്കുന്ന കോൺഗ്രസിനെ ഇന്ത്യയിലെ ജനങ്ങൾ പിഴുതെടുക്കുകയാണ്. കേരളത്തിന്റെ വികസനം തടയാനാണ് കോൺഗ്രസ് ശ്രമിക്കുന്നത്. മണ്ണെണ്ണ ഒഴിച്ച് ആളുകളെ കൊല്ലാനാണ് യൂത്ത് കോൺഗ്രസുകാർ സമരത്തിനിടെ ശ്രമിക്കുന്നതെന്നും അദ്ദേഹം ആരോപിച്ചു.
തന്നെ കവലച്ചട്ടമ്പി എന്ന് വിശേഷിപ്പിച്ച ഡീൻ കുര്യാക്കോസിനെതിരെയും കടുത്ത ഭാഷയിലാണ് അദ്ദേഹം പ്രതികരിച്ചത്. അടുത്ത ലോകസഭാ തിരഞ്ഞെടുപ്പിൽ ഡീനിനെ ഉടുമുണ്ടില്ലാതെ ഇടുക്കിയിൽ നിന്ന് തിരിച്ചയക്കും. പാർട്ടിയെ സരക്ഷിക്കാൻ ഇറങ്ങിത്തിരിച്ചവന് കവലച്ചട്ടമ്പിയുടെ വേഷമാണ് ചേരുന്നതെങ്കിൽ അത് അണിയാൻ മടിയില്ലെന്നും സി.വി വർഗീസ് പറഞ്ഞു.
എസ്എഫ്‌ഐ നേതാവ് അനീഷ് രാജന്റെ പത്താം രക്തസാക്ഷിത്വ ദിനാചരണവും, എകെജി, ഇഎംഎസ് അനുസ്മരണവും ഉദ്ഘാടനം ചെയ്ത് സംസാരിക്കവെയായിരുന്നു സി.വി വർഗീസിന്റെ വിവാദ പ്രസംഗം. ഇതിന് മുൻപ്, കെപിസിസി പ്രസിഡന്റ് കെ.സുധാകരന്റെ ജീവൻ സിപിഎം നൽകുന്ന ദാനമാണെന്ന സി.വി വർഗീസിന്റെ പ്രസ്താവന വിവാദമായിരുന്നു.
