നിങ്ങളുടെ ജീവിതം ഏറെ തിരക്കുപിടിച്ചതാണെന്ന് തോന്നുന്നുണ്ടെങ്കിൽ 24കാരിയായ ഈ യുവതിയെക്കുറിച്ച് ഒന്ന് അറിയുക.. തന്റെ 22 കുഞ്ഞുങ്ങളെ പരിപാലിക്കുന്നവളാണ് ക്രിസ്റ്റീന ഓസ്തുർക്ക് എന്ന ജോർജ്ജിയ സ്വദേശിനി.
22ൽ ഭൂരിഭാഗം കുഞ്ഞുങ്ങളും രണ്ടോ അതിൽ താഴെയോ പ്രായമുള്ളവരാണെന്നതാണ് സവിശേഷത. വെറും 24 വയസിനുള്ളിൽ 22 കുട്ടികൾ.. അതും, രണ്ട് വയസ് പ്രായമുള്ളവരാണ് മിക്കവരും. ഇതെങ്ങനെ ‘ഒപ്പിച്ചുവെന്നാണ്’ നിങ്ങളുടെ കൺഫ്യൂഷനെങ്കിൽ ക്രിസ്റ്റീനയുടെ കഥയറിഞ്ഞോളൂ..
ക്രിസ്റ്റീനയ്‌ക്കും അവളുടെ പങ്കാളി ഗാലിപ്പിനും ആകെ 23 കുട്ടികളാണ് ഉള്ളത്. ഇതിൽ 21 പേരും വാടക ഗർഭധാരണത്തിലൂടെ ജനിച്ചവരാണ്. ഇതിനായി ദമ്പതികൾ ചിലവിട്ടത് 195,000 ഡോളർ തുകയാണെന്നതാണ് അമ്പരപ്പിക്കുന്ന കാര്യം.
ക്രിസ്റ്റീനയുടെ സൂപ്പർ ബിഗ് ഫാമിലി ഈയടുത്താണ് ട്വിറ്ററിൽ വൈറലാകുന്നത്. ഇത്രയുമധികം കുഞ്ഞുങ്ങൾ എങ്ങിനെയുണ്ടായെന്ന് ആദ്യം ഫോളോവേഴ്‌സിന് പിടികിട്ടിയില്ല. പിന്നീടാണ് കുട്ടികൾ വന്ന വഴി സോഷ്യൽ മീഡിയ അറിഞ്ഞത്.
ക്രിസ്റ്റീനയുടെ മുൻ ബന്ധത്തിലുണ്ടായിരുന്ന ആറ് വയസുള്ള മകളും ഗാലിപ്പിന്റെ ആദ്യ ബന്ധത്തിലെ ഒരു കുഞ്ഞുമാണ് വീട്ടിലെ ആദ്യത്തെ കുട്ടികൾ. ശേഷം വാടക ഗർഭധാരണത്തിലൂടെ ഇരുവർക്കുമുണ്ടായ 21 കുട്ടികൾ കൂടി വന്നതോടെ കുടുംബം വലുതാകുകയായിരുന്നു.
16 ആയമാരാണ് കുഞ്ഞുങ്ങളെ നോക്കാൻ വീട്ടിലുള്ളത്. എല്ലാ വീട്ടിലെയും അമ്മമാരെങ്ങനെയാണോ അതുപോലെ തന്നെയാണ് താനെന്നും ഒരേയൊരു വ്യത്യാസം കുട്ടികളുടെ എണ്ണത്തിലാണെന്നും ക്രിസ്റ്റീന പറയുന്നു. കുട്ടികൾ വന്നതിന് ശേഷം ഒറ്റദിവസം പോലും തനിക്ക് ബോറടിച്ചിട്ടില്ലെന്നും ക്രിസ്റ്റീന കൂട്ടിച്ചേർത്തു.
യഥാർത്ഥത്തിൽ റഷ്യക്കാരിയാണ് ക്രിസ്റ്റീന. യുഎസിൽ സ്ഥിരതാമസമാക്കിയ യുവതിയും ഭർത്താവും എപ്പോഴും വലിയ കുടുംബമുണ്ടാകുന്നതിനെക്കുറിച്ച് സ്വപ്‌നം കണ്ടിരുന്നു. 100 കുട്ടികൾ വരെ തനിക്കുണ്ടായാൽ അത്രയും സന്തോഷമെന്നാണ് ക്രിസ്റ്റീന പറയുന്നത്. തൽക്കാലം ഇനി കുഞ്ഞുങ്ങൾ വേണമെന്ന ഉദ്ദേശ്യമില്ലെന്നും യുവതി വ്യക്തമാക്കി.
ആഴ്ചതോറും 20 വലിയ ഡയപ്പർ പാക്കറ്റുകളാണ് കുടുംബത്തിന് ആവശ്യമായിട്ടുള്ളത്. 53 പാക്കറ്റ് ബേബി ഫോർമുലയും ഓർഡർ ചെയ്യാറുണ്ട്. മൂന്ന് നിലകളുള്ള വീട്ടിൽ മൂന്ന് കുട്ടികളെ ഒരു മുറിയിലാക്കിയാണ് പരിചരിക്കുന്നത്. ക്രിസ്റ്റീനയെന്ന അമ്മയുടെ ജീവിതവും ദിനചര്യകളും കണ്ട് ഇപ്പോഴും വിസ്മയത്തിലാണ് സോഷ്യൽ മീഡിയ.
ക്രിസ്റ്റീനയുടെ കുടുംബ ചിത്രങ്ങൾ കാണാം..
