ന്യൂഡൽഹി: കോൺഗ്രസിന്റെ ഭരണകാലത്ത് ഭീകരവാദം എങ്ങനെ പടർന്നു പിടിച്ചുവെന്ന് അറിയാൻ ദ കശ്മീർ ഫയൽസ് കാണണമെന്ന് കേന്ദ്ര ആഭ്യന്തരമന്ത്രി അമിത് ഷാ. കശ്മീർ താഴ്വരയിൽ എങ്ങനെയാണ് തീവ്രവാദവും അതിക്രമങ്ങളും പിടിമുറുക്കിയത് ചിത്രം മനസിലാക്കി തരുമെന്ന് അമിത് ഷാ പറഞ്ഞു. അഹമ്മദാബാദിൽ സംഘടിപ്പിച്ച പൊതു പരിപാടിയിൽ സംസാരിക്കുകയായിരുന്നു അദ്ദേഹം.
രണ്ടാം തവണ നരേന്ദ്രമോദി സർക്കാർ അധികാരത്തിലേറിയപ്പോൾ കശ്മീരിന് അമിതാധികാരം നൽകുന്ന ആർട്ടിക്കിൾ 370 റദ്ദാക്കി. പ്രധാനമന്ത്രി ആർട്ടിക്കിൾ 370 റദ്ദാക്കാൻ തീരുമാനിച്ച നിമിഷം, അദ്ദേഹത്തെ പോലൊരു ശക്തനായ നേതാവാണ് രാജ്യം ഭരിക്കുന്നത് എല്ലാവർക്കും മനസിലായെന്ന് അമിത് ഷാ പറഞ്ഞു. നരേന്ദ്രമോദിയെ പോലുള്ള ഒരു നേതാവാണ് മുന്നിലുള്ളതെങ്കിൽ രാജ്യത്തിന് അസാദ്ധ്യമായതായി ഒന്നുമില്ലെന്നും അമിത് ഷാ വ്യക്തമാക്കി.
നരേന്ദ്രമോദി ആർട്ടിക്കിൾ 370 റദ്ദാക്കിയപ്പോഴാണ് ഇച്ഛാശക്തിയുള്ള ഭരണാധികാരിയുണ്ടെങ്കിൽ ഒന്നും അസാദ്ധ്യമല്ലെന്ന് ജനങ്ങൾക്ക് മനസിലായത്. പ്രധാനമന്ത്രിയുടെ നേതൃത്വത്തിൽ കയറ്റുമതി ചെയ്യുന്ന രാജ്യങ്ങളുടെ നിരയിലേക്ക് ഇന്ത്യ ഉയർന്നു. നരേന്ദ്രമോദി സർക്കാരിലുള്ള ജനങ്ങളുടെ വിശ്വാസമാണ് നാല് സംസ്ഥാനങ്ങളിലേയും നിയമസഭാ തെരഞ്ഞെടുപ്പിലെ വിജയം സൂചിപ്പിക്കുന്നതെന്നും അമിത് ഷാ കൂട്ടിച്ചേർത്തു.
