ഭോപ്പാൽ: വനിതാ ശുചീകരണ തൊഴിലാളിയുടെ കാൽ തൊട്ട് വണങ്ങിയും വേദി പങ്കിട്ടും കേന്ദ്ര വ്യോമയാനമന്ത്രി ജ്യോതിരാദിത്യ സിന്ധ്യ. മദ്ധ്യപ്രദേശിലെ ഒരു പൊതുപരിപാടിയ്‌ക്കിടെയാണ് സംഭവം. ഇവിടെ നിന്നുള്ള ചിത്രങ്ങൾ സോഷ്യൽ മീഡിയയിൽ ചർച്ചയാവുകയാണ്. മുൻസിപ്പൽ കോർപ്പറേഷന്റെ പ്രത്യേക പരിപാടിയിൽ പങ്കെടുക്കാനെത്തിയതാണ് അദ്ദേഹം.
ചടങ്ങിൽ പങ്കെടുക്കുന്നതിനിടെ പെട്ടന്ന് വേദിയിൽ നിന്നും സിന്ധ്യ പുറത്തേയ്‌ക്ക് ഇറങ്ങുകയായിരുന്നു. വേദിയിലിരിക്കുന്നവർ ആദ്യം പരിഭ്രാന്തരായെങ്കിലും പിന്നീടാണ് അവർക്ക് കാര്യം മനസിലായത്. വേദിവിട്ടിറങ്ങിയ കേന്ദ്രമന്ത്രി എത്തിയത് വേദിയ്‌ക്ക് പുറത്ത് നിന്ന ശുചീകരണ തൊഴിലാളിയെ കാണാനായിരുന്നു. പിന്നാലെ അവരെ വേദിയിലേക്ക് കൂട്ടിക്കൊണ്ട് വരുകയും ചെയ്തു.
आज ग्वालियर में स्वच्छता के दूत के रूप में कार्य कर रहे हमारे सफाई कर्मचारियों के अच्छे स्वास्थ्य और बेहतर काम के माहौल के लिए यूनिफार्म प्रदान की। इसके अलावा कर्मचारियों की हर तिमाही में स्वास्थ्य जांच भी शुरू की जाएगी और इसके लिए उन्हें स्वास्थ्य कार्ड भी प्रदान किए जाएंगे| pic.twitter.com/tedMfZe28X
— Jyotiraditya M. Scindia (@JM_Scindia) March 26, 2022
മുൻസിപ്പൽ കോർപ്പറേഷനിലെ തൂപ്പുകാരിയായ ബബിതയെയാണ് സിന്ധ്യ വേദിയിലേക്ക് കൊണ്ടുവന്ന് ആദരിച്ചത്. മറ്റൊരു തൊഴിലാളിയുടെ കാലിൽ വീണ് അനുഗ്രഹം വാങ്ങിക്കുകയും അദ്ദേഹം ചെയ്തു. ‘ഗ്വാളിയാറിനെ 25 വർഷമായി വൃത്തിയായും ഭംഗിയായും നിലനിർത്തുന്ന ജോലി വിശ്വസ്ഥതയോടെ ചെയ്ത ബബിതയെ പോലുള്ള നിരവധി പേർക്ക് എന്റെ അഭിവാദ്യങ്ങൾ’ എന്നാണ് സിന്ധ്യ പറഞ്ഞത്.
ചടങ്ങിൽ വനിതാ സ്വീപ്പർമാർക്കുള്ള ഹെൽത്ത് കാർഡുകളും ഗ്ലൗസും ഷൂസും തൊപ്പിയും ജാക്കറ്റും മന്ത്രി വിതരണം ചെയ്തു. ശുചീകരണ തൊഴിലാളികളെ ആദരിക്കേണ്ടത് എല്ലാ പൗരന്റേയും കടമയാണ്. തൊഴിലാളികൾക്ക് ആവശ്യമായ എല്ലാ സഹായങ്ങളും ചെയ്യും. ശുചിത്വത്തിന്റെ കാര്യത്തിൽ രാജ്യത്തെ ഒന്നാമതെത്തിയ്‌ക്കുകയാണ് ലക്ഷ്യമെന്നും ജ്യോതിരാദിത്യ സിന്ധ്യ വ്യക്തമാക്കി.
