ദുബായ്: ആഗോളതലത്തിലെ പ്രതിസന്ധികളുടെ പേരിൽ രാജ്യത്തെ ഇന്ധനവില ക്രമാതീതമായി വർദ്ധിക്കാതിരിക്കാൻ സർക്കാർ പ്രതിജ്ഞാബദ്ധമെന്ന് കേന്ദ്രമന്ത്രി അനുരാഗ് ഠാക്കൂർ. യുക്രെയ്‌നിലെ രാഷ്‌ട്രീയ സാഹചര്യവും റഷ്യയുടെ നടപടികളും ജാഗ്രതയോടെയാണ് നിരീക്ഷിക്കുന്നത്.
ഇന്ധനവിതരണ രംഗത്തുണ്ടാക്കുന്ന ഏറ്റക്കുറച്ചിലുകളെക്കുറിച്ച് കേന്ദ്രസർക്കാർ ബോധവാന്മാരാണെന്നും വില ക്രമാതീതമായി ഉയരാതിരിക്കാൻ സത്വര നടപടികളെടു ത്തിട്ടുണ്ടെന്നും അനുരാഗ് ഠാക്കൂർ പറഞ്ഞു.
യുക്രെയ്‌നിലെ സംഭവത്തെ തുടർന്ന് ആഗോളതലത്തിൽ ഇന്ധന ലഭ്യത കുറഞ്ഞത് ലോകത്തെ നിരവധി രാജ്യങ്ങളെ ബാധിച്ചിട്ടുണ്ട്. എന്നാൽ ഇന്ത്യയെ അത് ബാധിച്ചിട്ടില്ല. കേന്ദ്രസർക്കാർ വില വർദ്ധിക്കുന്നത് നിയന്ത്രിക്കാൻ നടപടികൾ എടുത്തിട്ടുണ്ടെന്നും അനുരാഗ് ഠാക്കൂർ പറഞ്ഞു.
ആഗോള തലത്തിലെ പ്രതിസന്ധികളുണ്ടാക്കുന്ന ചലനം നിയന്ത്രിക്കാൻ നമുക്കാവില്ല. എന്നാൽ ഇന്ത്യയ്‌ക്കകത്തെ വില ഉയരാതിരിക്കാൻ ഏറ്റവും ഫലപ്രദമായ നടപടികളാണ് കൈക്കൊണ്ടിട്ടുള്ളതെന്നും കേന്ദ്രവാർത്താവിതരണ പ്രക്ഷേപണ മന്ത്രി പറഞ്ഞു.
