ബ്ലോക്കിൽപ്പെട്ട ആംബുലൻസിന് വഴിയൊരുക്കി യോഗി ആദിത്യനാഥ്; കൈയ്യടിച്ച് സോഷ്യൽമീഡിയ; മറ്റുള്ളവർക്ക് മാതൃകയെന്നും അഭിപ്രായം

ലക്‌നൗ: ബ്ലോക്കിൽ കിടന്ന ആംബുലൻസിന് കടന്നുപോകാനായി വഴിയൊരുക്കി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. മുഖ്യമന്ത്രിയുടെ വാഹനവ്യൂവം ഹസ്രത്ഗഞ്ചിൽ നിന്ന് ബന്ദരിയാബാഗിലേയ്‌ക്ക് പോകുമ്പോൾ, രാജ്ഭവന് സമീപമാണ് സംഭവമുണ്ടായത്. ഡിസിപി ട്രാഫിക്ക് സുഭാഷ് ചന്ദ്ര ശാക്യയാണ് ഇക്കാര്യം വെളിപ്പെടുത്തിയത്.

മുഖ്യമന്ത്രിയുടെ വാഹനത്തിന് കടന്നുപോകുന്നതിനായി മറ്റ് വാഹനങ്ങൾ തടഞ്ഞിരുന്നു. ഇതിനൊപ്പം ഒരു ആംബുലൻസുമുണ്ടായിരുന്നു. ഇത് ശ്രദ്ധയിൽപ്പെട്ട മുഖ്യമന്ത്രി, തന്റെ വാഹനവ്യൂഹം രോഡരികിൽ നിർത്തിച്ച്, ആംബുലൻസിന് കടന്നുപോകാൻ വഴിയൊരുക്കി നൽകുകയായിരുന്നുവെന്നും ഡിസിപി പറഞ്ഞു.

അദ്ദേഹത്തിന്റെ വാഹനവ്യൂഹം യാത്ര തിരിയ്‌ക്കുന്നത് വരെ ആളുകൾ അദ്ദേഹത്തിന് ജയ് വിളിക്കുകയായിരുന്നുവെന്നും ഡിസിപി കൂട്ടിച്ചേർത്തു. വാർത്ത പുറത്തുവന്നതോടെ നിരവധി ആളുകളാണ് യോഗി ആദിത്യനാഥിന് അഭിനന്ദനങ്ങൾ നേർന്ന് രംഗത്തെത്തിയത്.

അദ്ദേഹത്തിന്റെ മനുഷ്യത്വപരമായ ഇടപെടലുകളും, ആംബുലൻസ് വകവെയ്‌ക്കാതെ കടന്നുപോകാമായിരുന്നിട്ടും അത് ചെയ്യാതെ ബ്ലോക്കിൽപ്പെട്ട ആംബുലൻസിന് വഴിയൊരുക്കിയതുമെല്ലാം മറ്റുള്ളവർക്ക് മാതൃകയാണെന്നും സമൂഹമാദ്ധ്യങ്ങൾ വിലയിരുത്തി. ഉത്തർപ്രദേശ് തിരഞ്ഞെടുപ്പിൽ മികച്ച ഭൂരിപക്ഷത്തോടെ രണ്ടാമതും അധികാരത്തിലെത്തിയ യോഗി സർക്കാർ കഴിഞ്ഞയാഴ്‌ച്ചയാണ് സത്യപ്രതിജ്ഞ ചെയ്ത് അധികാരത്തിലേറിയത്.