വിൽപ്പന ആരംഭിച്ച് കുറച്ച് നാളുകൾക്കുള്ളിൽ തന്നെ പരാതികളുടെ പെരുമഴക്കാലമായിരുന്നു ഒല ഇലക്ട്രിക് സ്‌കൂട്ടറിന്. ഇവയിൽ ചിലത് നിർമ്മാതാക്കളെ മനപൂർവ്വം താഴ്‌ത്തിക്കെട്ടുക എന്ന ഉദ്ദേശ്യത്തോടുകൂടിയതായിരുന്നുവെങ്കിൽ, മറ്റ് ചിലത് യഥാർത്ഥ പരാതികളായിരുന്നു. കഴിഞ്ഞ ദിവസം ഒല ഇലക്ട്രിക് സ്‌കൂട്ടറിന് തീപിടിച്ചിരുന്നു. നിർമ്മാണത്തിലെ അപാകതയെന്നാണ് ഒരു വിഭാഗം ഇതിനെ നോക്കി കണ്ടത്. ഇക്കാര്യത്തിൽ നിർമ്മാതാക്കൾ ഒരു വിശദീകരണം നൽകുന്നതിന് മുൻപ് തന്നെ അടുത്ത പരാതി ഒലയ്‌ക്ക് ലഭിച്ചിരിക്കുകയാണ്. ഇത്തവണ ആക്‌സിലറേറ്റർ കൊടുക്കുമ്പോൾ സ്‌കൂട്ടർ മുന്നോട്ട് പോകുന്നതിന് പകരം, പിന്നോട്ട് പോകുന്നുവെന്നാണ് ഉപഭോക്താവിന്റെ പരാതി.
സമൂഹമാദ്ധ്യമങ്ങളിൽ പങ്കുവെച്ച ഒരു വീഡിയോയിലൂടെയാണ് സ്‌കൂട്ടറിന്റെ ഈ അപാകത പുറത്തായത്. വീഡിയോയുടെ ഉറവിടം വ്യക്തമല്ലെങ്കിലും, ഇതിനോടകം ദൃശ്യങ്ങൾ സമൂഹമാദ്ധ്യമങ്ങളിൽ വൈറലാണ്. ഒല എസ്1 പ്രോ സ്‌കൂട്ടർ നിലത്ത് കിടത്തിയിരിക്കുന്നതും, മുന്നോട്ട് ആക്‌സിലറേറ്റർ നൽകുമ്പോൾ, സ്‌കൂട്ടറിന്റെ വീൽ പിന്നോട്ട് കറങ്ങുന്നതും വീഡിയോയിൽ കാണാം. വീൽ പിന്നോട്ട് പോകുന്നതിനൊപ്പം സ്‌കൂട്ടറിന്റെ ഇൻഡിക്കേറ്ററുകളും മിന്നുണ്ട്.
ഇതാദ്യമായല്ല ഒല സ്‌കൂട്ടർ പിന്നോട്ട് പോകുന്നു എന്ന തരത്തിൽ പരാതി ഉയരുന്നത്. ഇതിന് മുൻപും ഇത്തരത്തിലുള്ള പരാതി സമൂഹമാദ്ധ്യമങ്ങളിലൂടെ ഉയർന്നിരുന്നു. അന്നും ഒല എസ്1 പ്രോ സ്‌കൂട്ടറിനായിരുന്നു ഈ പ്രശ്‌നം. സ്‌കൂട്ടറിന്റെ സ്പീഡ് കൂട്ടാൻ ശ്രമിച്ചപ്പോഴാണ് വാഹനം പിന്നോട്ട് പോയതെന്നാണ് അന്ന് ലഭിച്ച പരാതി.
ഒല എസ്1 പ്രോ സ്‌കൂട്ടറിന് റിവേഴ്‌സ് മോഡ് ഉണ്ടെങ്കിലും, ഇത്തരത്തിൽ മുന്നോട്ട് ആക്‌സിലറേറ്റ് ചെയ്യുമ്പോൾ പിന്നോട്ട് പോകുന്നത് യഥാർത്ഥത്തിൽ സോഫ്റ്റ് വെയറിന്റെ പിശകാണെന്നാണ് വിലയിരുത്തൽ. സ്‌കൂട്ടറിന് റിവേഴ്‌സ് മോഡ് ഉള്ളത് ഒരു ഉപകാരമാണെങ്കിലും, മുന്നോട്ട് പോകേണ്ട സമയത്ത് പിന്നോട്ട് പോകുന്നത് എന്തിനാണെന്ന് മനസിലാകുന്നില്ലെന്നാണ് അഭിപ്രായങ്ങൾ ഉയരുന്നത്.
ഒല ഇലക്ട്രിക് സ്‌കൂട്ടറിന്റെ വിവിധ പ്രവർത്തനങ്ങൾ നിയന്ത്രിക്കുന്നത് സോഫ്റ്റ് വെയറുകളാണ്. അതിനാൽ തന്നെ ഇവയിലുണ്ടാകുന്ന ചെറിയ പ്രശ്‌നങ്ങൾ പോലും, സ്‌കൂട്ടറിന്റെ പ്രവർത്തനത്തെ ബാധിച്ചേക്കാം. നിലവിൽ 1.29 ലക്ഷം രൂപയാണ് ഒല എസ്1 പ്രോയുടെ വില.
