കണ്ണൂർ: സിപിഎം 23 ാം പാർട്ടി കോൺഗ്രസിലെ സമാപന പ്രസംഗം ബാങ്ക് വിളി ഉയർന്നതോടെ നിർത്തിവെച്ച് മുഖ്യമന്ത്രി പിണറായി വിജയൻ. മുഖ്യമന്ത്രി പ്രസംഗിക്കാൻ തുടങ്ങിയതിന്റെ പിന്നാലെയായിരുന്നു സമീപത്തെ പളളിയിൽ നിന്നും ബാങ്ക് വിളി ഉയർന്നത്. ബാങ്ക് വിളി തുടങ്ങിയെന്നും അത് കഴിഞ്ഞിട്ട് തുടരാമെന്നും പറഞ്ഞ് പിണറായി പ്രസംഗം നിർത്തുകയായിരുന്നു.
ബാങ്ക് വിളി പൂർത്തിയായതിന് ശേഷമാണ് പിണറായി പിന്നീട് പ്രസംഗം തുടർന്നത്. പാർട്ടി കോൺഗ്രസിനിടെ മരണപ്പെട്ട കേന്ദ്ര കമ്മറ്റിയംഗം എംസി ജോസഫൈന് ആദരാഞ്ജലി അർപ്പിച്ചുകൊണ്ടായിരുന്നു പിണറായി പ്രസംഗം തുടങ്ങിയത്. ഇന്നലെ പാർട്ടി കോൺഗ്രസിന്റെ ഭാഗമായി നടന്ന സെമിനാറിൽ പങ്കെടുത്ത കെവി തോമസിന് യേശുവിന്റെ ചിത്രം സമ്മാനിച്ചത് സമൂഹമാദ്ധ്യമങ്ങളിൽ ട്രോളുകൾക്കും വിമർശനങ്ങൾക്കും വഴിവെച്ചിരുന്നു. ഇതിന് പിന്നാലെയാണ് ബാങ്ക് വിളിക്കിടെ പിണറായി പ്രസംഗം നിർത്തിയത്.
സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനാണ് കെവി തോമസിന് യേശുവിന്റെ ചിത്രം ഉപഹാരമായി നൽകി സ്വീകരിച്ചത്. മതമില്ലെന്ന് പറയുന്ന പാർട്ടി ദൈവത്തിന്റെ ചിത്രം സമ്മാനിച്ചതിലെ പൊരുത്തക്കേടായിരുന്നു സമൂഹമാദ്ധ്യമങ്ങളിൽ ചർച്ചയ്ക്ക് വഴിവെച്ചത്. കെവി തോമസിനൊപ്പം സെമിനാറിൽ പങ്കെടുത്ത തമിഴ്നാട് മുഖ്യമന്ത്രി സ്റ്റാലിന് കാളയെ പൂട്ടുന്ന കർഷകന്റെ ചിത്രമാണ് നൽകിയത്.
വിവാദമായ കെ റെയിൽ പദ്ധതിയിൽ എൽഡിഎഫ് സർക്കാരിനോട് നിങ്ങൾ ധൈര്യമായി മുന്നോട്ടു പോകൂവെന്നാണ് പാർട്ടി കോൺഗ്രസ് പറഞ്ഞതെന്ന് അവകാശപ്പെട്ട പിണറായി എൽഡിഎഫ് കൊണ്ടുവന്നതിന്റെ പേരിലാണ് പദ്ധതിയെ എതിർക്കുന്നതെന്നും ആരോപിച്ചു. ഇന്ത്യയിലെ കമ്യൂണിസ്റ്റ് പ്രസ്ഥാനത്തിന്റെ കരുത്തുറ്റ സമ്മേളനമായി കണ്ണൂർ സമ്മേളനം മാറിയെന്നും പിണറായി അഭിപ്രായപ്പെട്ടു.
Comments