കൊച്ചി: കോണ്ഗ്രസ് നേതാവ് പ്രൊഫ. കെ വി തോമസ് എഐസിസിക്ക് വിശദീകരണം നല്കി. സിപിഎം പാര്ട്ടി കോണ്ഗ്രസ് സെമിനാറില് പങ്കെടുത്തതുമായി ബന്ധപ്പെട്ടാണ് വിശദീകരണം നല്കിയത്. പാര്ട്ടി നിര്ദ്ദേശം ലംഘിച്ചതിനാല് നടപടിയെടുക്കാതിരിക്കാന് വിശദീകരണം നല്കണമെന്ന് നേരത്തെ എഐസിസി നേതൃത്വം കെ വി തോമസിനോട് ആവശ്യപെട്ടിരുന്നു.
ഇ മെയില് വഴിയാണ് കെ വി തോമസ് എഐസിസിക്ക് മറുപടി നല്കിയത്. നിലപാടില് ഉറച്ചുനില്ക്കുന്നുവെന്നും, ദേശീയ രാഷ്ട്രീയത്തില് സിപിഎമ്മിനെ കോണ്ഗ്രസ് ശത്രുവായി കണേണ്ടതില്ലെന്നുമാണ് മറുപടിയിലുള്ളത് എന്നാണ് സൂചന. അതേസമയം കോണ്ഗ്രസ് രാഷ്ട്രീയ കാര്യസമിതിയോഗത്തിലേക്ക് കെ വി തോമസിനെ ക്ഷണിച്ചിട്ടില്ല.
കോണ്ഗ്രസിന്റെ നിര്ണ്ണായക തീരുമാനങ്ങളെടുക്കുന്ന വാര്റൂമില് മൂന്ന് മണിക്കൂര് നീണ്ട യോഗത്തിന് ശേഷമാണ് കെ വി തോമസിന് കാരണം കാണിക്കല് നോട്ടീസയക്കാന് നേരത്തെ തീരുമാനിച്ചത്. കെപിസിസി പ്രസിഡന്റ് കെ സുധാകരന് നല്കിയ റിപ്പോര്ട്ടനുസരിച്ച് ഗുരുതരമായ അച്ചടക്ക ലംഘനമാണ് തോമസ് നടത്തിയതെന്ന് അച്ചടക്ക സമിതി വിലയിരുത്തിയിരുന്നു. കെ.സുധാകരന്റെ വ്യക്തിവിരോധമാണ് തന്നോട് വിശദീകരണം ചോദിക്കുന്ന സാഹചര്യത്തിലേക്ക് നയിച്ചതെന്നാണ് കെ.വി.തോമസ് വിശ്വസിക്കുന്നത്. എ.ഐ.സി.സി യാവും തോമസിന്റെ മറുപടിയില് മേല് തുടര്നടപടി സ്വീകരിക്കുക
