മാരുതി സുസുക്കി എർട്ടിഗയുടെ പുതിയ ഫേസ് ലിഫ്റ്റ് പതിപ്പ് കഴിഞ്ഞ ദിവസം പുറത്തിറക്കിയിരുന്നു. അതിന് പിന്നാലെ ഇപ്പോഴിതാ എക്‌സ്എൽ6 എംപിവിയുടെ ഫേസ് ലിഫ്റ്റ് നിരത്തിലിറക്കിയിരിക്കുകയാണ് മാരുതി. 2019 മുതൽ ഇന്ത്യൻ വാഹനപ്രേമികളുടെ മനസ്സിലിടം പിടിച്ച എംപിവിയുടെ ആദ്യ ഫേസ് ലിഫ്റ്റ് പതിപ്പാണിത്. 11.29 ലക്ഷം രൂപയാണ് വാഹനത്തിന്റെ എക്‌സ്-ഷോറൂം വില. പുതിയ എർട്ടിഗയെ പോലെ തന്നെ, എക്‌സ്എൽ6ലും ഒരു പുതിയ പെട്രോൾ എഞ്ചിനും, പുതിയ ഓട്ടോമാറ്റിക് ട്രാൻസ്മിഷനും മാരുതി ഉൾപ്പെടുത്തിയിട്ടുണ്ട്. ഫേസ് ലിഫ്റ്റ് പതിപ്പിനായുള്ള ബുക്കിംഗ് മാരുതി കഴിഞ്ഞ ആഴ്ച തന്നെ ആരംഭിച്ചിരുന്നു.
പുറം കാഴ്ചയിൽ കാര്യമായ മാറ്റങ്ങളില്ലെങ്കിലും, മുൻ മോഡലിൽ നിന്നും വ്യത്യസ്തമായി ആധുനിക ഗാഡ്‌ജെറ്റുകളുടെ ഒരു നിര തന്നെ മാരുതി എക്‌സ്എൽ6 ഫേസ് ലിഫ്റ്റ് പതിപ്പിൽ ഉൾപ്പെടുത്തിയിട്ടുണ്ട്. മുൻഗാമിയുടേതിന് സമാനമായ ഡിസൈനാണ് പുതിയ പതിപ്പിന് നൽകിയിരിക്കുന്നത്. ക്രോം സറൗണ്ടുകളുള്ള പുനർരൂപകൽപ്പന ചെയ്ത ഗ്രിൽ, ക്രോം ഇൻസേർട്ടുകൾ, സ്‌മോക്കി 3ഡി ടെയിൽ ലൈറ്റുകൾ എന്നിവയാണ് പുറമെയുള്ള ചില മാറ്റങ്ങൾ. 16-ഇഞ്ച് അലോയ് വീലുകൾക്കും പുതിയ ഡിസൈൻ നൽകിയിട്ടുണ്ട്. മൂന്ന് പുതിയ കളർ ഓപ്ഷനുകളിലാണ് വാഹനം പുറത്തിറങ്ങുന്നത്. കൂടാതെ, പുതിയ ആൽഫ പ്ലസ് ടോപ്പ് എൻഡ് വേരിയന്റും കമ്പനി വാഗ്ദാനം ചെയ്യുന്നു.
അകത്തളത്തിലും മുൻഗാമിയുടേതിന് സമാനമായ ഡിസൈനാണ് നൽകിയിട്ടുള്ളത്. എന്നാൽ, സ്മാർട്ട്‌പ്ലേ പ്രോ ടച്ച്‌സ്‌ക്രീനോടുകൂടിയ പുതിയ ഏഴ് ഇഞ്ച് ടച്ച്‌സ്‌ക്രീൻ, റിമോട്ട് എസി സ്റ്റാർട്ട്, ഓൺ-ബോർഡ് വോയ്‌സ് അസിസ്റ്റന്റ് കുടങ്ങിയ പുതിയ ഫീച്ചറുകൾ കാറിന്റെ അകത്തളത്തിൽ ഉൾപ്പെടുത്തിയിട്ടുണ്ട്. 360ൃഡിഗ്രി ക്യാമറ, ടയർ പ്രഷർ മോണിറ്ററിംഗ് സിസ്റ്റം, വെന്റിലേറ്റഡ് ഫ്രണ്ട് സീറ്റുകൾ, ക്രൂയിസ് കൺട്രോൾ, ഓട്ടോമാറ്റിക് എസി, കീലെസ് എൻട്രി, ഐഡിൽ സ്‌റ്റോപ്പ്-സ്റ്റാർട്ട് എന്നിവയും വാഹനത്തിന് ലഭിക്കുന്നു. സുരക്ഷയ്‌ക്കായി ആറ് എയർബാഗുകളും, എബിഎസ്, ഇബിഡി, റിവേഴ്‌സിംഗ് സെൻസറുകൾ, ഇലക്ട്രോണിക് സ്റ്റെബിലിറ്റി പ്രോഗ്രാം എന്നിവയും ഉണ്ട്.
പ്രോഗ്രസീവ് സ്മാർട്ട് ഹൈബ്രിഡ് സാങ്കേതിക വിദ്യായോട് കൂടിയ കെ-സീരീസ് 1.5 ലിറ്റർ ഡ്യുവൽ ജെറ്റ്, ഡ്യുവൽ വിവിടി എഞ്ചിനാണ് വാഹനത്തിന്റെ ഹൃദയം. ഇത് 137 എൻഎം ടോർക്കും, 102 ബിഎച്ച്പി പവറും ഉത്പാദിപ്പിക്കുന്നു.
