കുളത്തിൽ കുളിക്കാനിറങ്ങിയ എട്ടുവയസ്സുകാരൻ മുതലയുടെ ആക്രമണത്തിൽ കൊല്ലപ്പെട്ടതായി അധികൃതർ അറിയിച്ചു. ഉത്തർപ്രദേശിലെ ബഹ്റൈച്ചിലാണ് ദാരുണമായ സംഭവം. മോട്ടിപൂർ പോലീസ് സ്റ്റേഷൻ പരിധിയിലെ ഗുഡ് ഗ്രാമത്തിലെ വീരേന്ദ്രയാണ് മരിച്ചത്. ശനിയാഴ്ച ഉച്ചയോടെയാണ് സംഭവം നടന്നത്. ഞായറാഴ്ച പുലർച്ചെ മുങ്ങൽ വിദഗ്ധർ മൃതദേഹത്തിന്റെ അവശിഷ്ടങ്ങൾ കണ്ടെടുത്തു.
വീരേന്ദ്ര സഹോദരിയോടൊപ്പം കുളത്തിലേക്ക് പോയപ്പോഴാണ് മുതല ആക്രമിച്ചതെന്ന് ഡിവിഷണൽ ഫോറസ്റ്റ് ഓഫീസർ (ഡിഎഫ്ഒ) ആകാശ്ദീപ് ബധവാൻ പറഞ്ഞു. കുളിക്കുന്നതിനിടെ ഒരു മുതല അവനെ പിടിച്ച് വെള്ളത്തിനടിയിലേക്ക് വലിച്ചിഴച്ചു. സഹോദരി ഓടി വീട്ടിലെത്തി വീട്ടുകാരെ വിവരമറിയിച്ചു. ഉടൻ തന്നെ വനം വകുപ്പ് ഉദ്യോഗസ്ഥർ തിരച്ചിൽ ആരംഭിച്ചു.
”മരിച്ചവരുടെ അവശിഷ്ടങ്ങൾ കണ്ടെടുത്തു പോസ്റ്റ്മോർട്ടത്തിനായി അയച്ചിട്ടുണ്ട്,” മരിച്ചയാളുടെ കുടുംബത്തിന് വനം വകുപ്പ് ആവശ്യമായ സഹായം നൽകുമെന്ന് ഡിഎഫ്ഒ പറഞ്ഞു. കുളത്തിൽ നിന്ന് മുതലയെ പിടികൂടാനുള്ള ശ്രമത്തിലാണ് വനംവകുപ്പ്. ഇതിനെ പിന്നീട് നദിയിലേക്ക് മാറ്റും.
