ശ്രീനഗർ: കശ്മീരി പണ്ഡിറ്റുകൾക്ക് എല്ലാ വിധത്തിലുള്ള പിന്തുണയും പ്രഖ്യാപിക്കുന്നതായി കേന്ദ്ര മന്ത്രി പ്രഹ്ളാദ് പട്ടേൽ. കശ്മീരിൽ ത്രിദിന സന്ദർശനത്തിനെത്തിയ അദ്ദേഹം കശ്മീരി പണ്ഡിറ്റുകളുടെ പ്രതിനിധികളെ സന്ദർശിച്ചു. പണ്ഡിറ്റുകൾക്ക് കൂട്ടമായി ജീവിക്കാൻ പ്രത്യേക സ്ഥലം നൽകണമെന്ന ആവശ്യം അനുഭാവപൂർവ്വം പരിഗണിക്കാമെന്ന് അദ്ദേഹം പ്രതിനിധികൾക്ക് ഉറപ്പ് നൽകി.
കശ്മീരി പണ്ഡിറ്റുകളുടെ വംശഹത്യക്ക് ഉത്തരവാദികളായവർക്ക് കർശന ശിക്ഷ ഉറപ്പ് വരുത്തണമെന്ന് പണ്ഡിറ്റുകളുടെ പ്രതിനിധികൾ കേന്ദ്ര മന്ത്രിയോട് ആവശ്യപ്പെട്ടു. മിക്ക കേസുകളിലും പുനരന്വേഷണം പ്രഖ്യാപിച്ചതായും അർഹമായ നീതി എല്ലാവർക്കും ലഭ്യമാകുമെന്നും പ്രഹ്ളാദ് പട്ടേൽ പണ്ഡിറ്റുകൾക്ക് ഉറപ്പ് നൽകി.
കശ്മീരി പണ്ഡിറ്റുകളുടെ എല്ലാ പ്രശ്നങ്ങളും പരിഹരിക്കാൻ കേന്ദ്ര സർക്കാർ കർമ്മ പദ്ധതി ആവിഷ്കരിച്ചതായി കേന്ദ്ര മന്ത്രി മാദ്ധ്യമ പ്രവർത്തകരോട് പറഞ്ഞു. കശ്മീരിൽ ഭീകരവാദം അന്ത്യശ്വാസം വലിക്കുകയാണ്. തീവ്രവാദ മുക്ത കശ്മീർ എന്ന സ്വപ്നം സാക്ഷാത്കരിച്ചതിന് ശേഷം സർക്കാർ ചില സുപ്രധാന നടപടികളിലേക്ക് കടക്കും. തലമുറകൾ നീണ്ടു നിന്ന വംശീയ ഉന്മൂലന ശ്രമങ്ങളെ അതിജീവിച്ചും അസ്തിത്വം കാത്ത് സൂക്ഷിക്കാൻ പൊരുതുന്ന കശ്മീരി പണ്ഡിറ്റുകൾ യഥാർത്ഥ പോരാളികളാണ്. അവരുടെ പോരാട്ട വീര്യത്തെ താൻ അഭിനന്ദിക്കുകയാണെന്നും പ്രഹ്ളാദ് പട്ടേൽ പറഞ്ഞു.
Comments