മനുഷ്യർ പൊതുവേ മൃഗങ്ങളെ ഓമനിച്ച് വളർത്താൻ ഇഷ്ടപ്പെടുന്നവരാണ്. അതിനി നായയാണെങ്കിലും , പൂച്ചയാണെങ്കിലും മറ്റെന്താണെങ്കിലും. ചിലരാകട്ടെ ഇവയെ വർളത്തുമ്പോൾ പാലിക്കേണ്ട മുൻകരുതലുകൾ സ്വീകരിക്കും ,ചിലർ അത് അവഗണിക്കും. എന്നാൽ കഴിഞ്ഞ ദിവസം പാലക്കാട് സ്വദേശി ശ്രീലക്ഷ്മി എന്ന വിദ്യാർത്ഥിനി പേ വിഷബാധയേറ്റ് മരിച്ച സംഭവം മൃഗങ്ങളെ വളർത്തുമ്പോൾ പാലിക്കേണ്ട മുൻകരുതലുകളെക്കുറിച്ച് ഒരിക്കൽകൂടി നമ്മെ ഓർമ്മിപ്പിക്കുകയാണ്.
പേവിഷബാധയെക്കുറിച്ച് അറിഞ്ഞിരിക്കേണ്ട ചില അടിസ്ഥാന വിവരങ്ങളാണ് ഇനി പറയുന്നത് .ഒരു വർഷം ഇന്ത്യയിൽ റിപ്പോർട്ട് ചെയ്യുന്നത് ഏകദേശം ഇരുപതിനായിരം റാബീസ് മരണങ്ങളാണ് . കുത്തിവെയ്പ്പിലൂടെയും , ചികിത്സയിലൂടെയും ഒഴിവാക്കാമായിരുന്ന മരണങ്ങളാണ് ഇതിൽ ഭൂരിഭാഗവും.
മുമ്പ് പേ വിഷബാധയ്‌ക്ക് പൊക്കിളിന് ചുറ്റും ആയിരുന്നു കുത്തിവെയ്പ്പ് എടുത്തിരുന്നത് . പലർക്കും ഇത് പേടി ആയിരുന്നു. എന്നാൽ ഇന്ന് തികച്ചും സുരക്ഷിതമായി, അപൂർവ്വമായി മാത്രം പാർശ്വഫലങ്ങൾ ഉണ്ടാകുന്ന, വളരെ ചെറിയ അളവിൽ മാത്രം കുത്തിവെക്കേണ്ടുന്ന മരുന്നുകൾ ,സൗജന്യമായി ലഭിക്കുന്നുണ്ട്. സൗജന്യമായി മരുന്നുകൾ ലഭ്യമാക്കിയിട്ടും ഇതിനെക്കുറിച്ചുളള അജ്ഞതയാകാം മുൻകരുതൽ കുത്തിവെയ്പുകൾ എടുപ്പിക്കുന്നതിൽ നിന്ന് ഭൂരിഭാഗം പേരെയും പിന്തിരിപ്പിക്കുന്നത്.
മനുഷ്യരിലേക്ക് പേ വിഷബാധ പകരുന്നത് രോഗാണുക്കളുള്ള മൃഗങ്ങളുടെ തുപ്പൽ വഴി ആണ്. കടിക്കുമ്പോഴോ, മുറിവിൽ നക്കുമ്പോഴോ രോഗം പകരാം. അസുഖം തലച്ചോറിനെ ആണ് ബാധിക്കുന്നത്. മുറിവിൽ നിന്ന് രോഗാണുക്കൾ നാഡികൾ വഴി തലച്ചോറിൽ എത്തുമ്പോഴാണ് രോഗ ലക്ഷണങ്ങൾ കാണിച്ചു തുടങ്ങുന്നത്. രോഗ ലക്ഷണങ്ങൾ കാണിച്ചു തുടങ്ങിയാൽ പിന്നെ അസുഖം ചികിത്സിച്ച് ഭേദമാക്കുക വളരെ ബുദ്ധിമുട്ടാണ്. അതേസമയം 90 ശതമാനം ആളുകൾക്കും അസുഖം പകരുന്നത് പട്ടിയിൽ നിന്നാണ്. പൂച്ച, വളർത്തു മൃഗങ്ങൾ, വന്യ ജീവികൾ എന്നിവ ഒക്കെ അസുഖം പരത്താൻ കഴിവുള്ളവരാണ്. എലി, അണ്ണാൻ , ചിലതരം വവ്വാലുകൾ തുടങ്ങിയവയും അസുഖം പരത്താറുണ്ട് .
ഈ മൃഗങ്ങൾ കടിച്ചാൽ എന്താണ് ചെയ്യേണ്ടത് ? പലർക്കും അതും അറിയില്ല. ആദ്യത്തെ അങ്കലാപ്പിൽ തൊട്ടടുത്ത നിമിഷം അടിയന്തിരമായി ചെയ്യേണ്ട കാര്യം നമ്മൾ വിട്ടുപോകുകയും ചെയ്യും.
വീണ്ടും കടി ഏൽക്കാതെ നോക്കണം, പറ്റുമെങ്കിൽ മൃഗത്തെ എവിടെയെങ്കിലും പൂട്ടിയിടുകയും നിരീക്ഷിക്കുകയും ചെയ്യുക.
എങ്ങനെ ചികിത്സിക്കാം .
കടിയേറ്റ ഭാഗം ഒഴുകുന്ന വെള്ളത്തിൽ 10 മുതൽ 15 മിനിറ്റ് വരെ കഴുകണം . പൈപ്പിലൂടെ വരുന്ന വെള്ളം ആണെങ്കിലും മതിയാകും. വെറും വെള്ളത്തിൽ കഴുകുന്നതിലുപരി സോപ്പോ മറ്റ് ഡിറ്റർജെന്റുകളോ ഉപയോഗിക്കാവുന്നതാണ് .
മുറിവിൽ പിടിച്ചിരിക്കുന്ന വൈറസുകളെ നീക്കം ചെയ്യുന്നതിനാണ് ഇത്. മുറിവ് സംഭവിച്ച ഉടൻ കഴുകിയാൽ അത്രയും നല്ലത്. ഇതിന് പുറനെ ഒന്ന് ഓർക്കുക വെറും കൈ കൊണ്ട് മുറിവിൽ സ്പർശിക്കുന്നത് ഒഴിവാക്കണം.ഇത്തരത്തിൽ സ്പർശിക്കുന്നത് വിഷബാധ പകരാൻ കാരണമാകും .
മുറിവിൽ മഞ്ഞൾപ്പെടി ,എണ്ണ, കാപ്പിപ്പൊടി തുടങ്ങിയ സാധനങ്ങൾ പുരട്ടുന്ന ശീലം നമ്മുടെ നാട്ടിൻപുറങ്ങളിൽ ഉണ്ട്. ഇങ്ങനെ ചെയ്യുന്നത് കൊണ്ട് ഗുണങ്ങൾ ഒന്നും ഇല്ല. പകരം മുറിവ് പഴുക്കുന്നതിനാകും അത് വഴിവക്കുക. അത്തരത്തിൽ ആരെങ്കിലും പ്രവർത്തിച്ചാൽ ഉടൻ അത് കഴുകി വൃത്തിയാക്കുക.
സാധാരണ ഗതിയിൽ മൃഗങ്ങൾ കടിച്ച് ഉണ്ടാകുന്ന മുറിവുകളിൽ തുന്നൽ ഇടാറില്ല. രക്തം നിൽക്കാതെ വരുന്ന മുറിവുകളിൽ മാത്രം ചില സാഹചര്യങ്ങളിൽ ഇമ്മ്യൂണോഗ്ലോബുലിൻ കുത്തിവയ്പ്പ് എടുത്തതിനു ശേഷം തുന്നൽ ഇടാറുണ്ട്. രക്തം പൊടിയുന്ന മുറിവുകൾ ഉണ്ടായാൽ ഇമ്മ്യൂണോഗ്ലോബുലിൻ എടുക്കുന്ന കാര്യം പ്രത്യേകം ശ്രദ്ധിക്കുക. ഒന്ന് ഓർക്കുക പ്രഥമിക ചികിത്സ സ്വീകരിക്കാതെ മുറിവ് ഉണക്കുന്നത് കൊണ്ട് ഗുണം ഒന്നും ഉണ്ടാകില്ല.പ്രതിരോധ മരുന്നു സ്വീകരിക്കുന്നതും ഇതിൽ പ്രധാനമാണ്.
