ഒരു കുഞ്ഞിനെ വേണമെന്ന് ആഗ്രഹിക്കുന്ന ദമ്പതികൾ വിരളമല്ല. അതിൽ പ്രത്യേകിച്ച് പുതുമയുമില്ല. എന്നാൽ 1.14 കോടി രൂപ ചിലവഴിച്ച് ഒരു കുഞ്ഞിനെ സ്വന്തമാക്കാൻ ശ്രമിക്കുന്ന ദമ്പതികൾ ഇപ്പോൾ സോഷ്യൽ മീഡിയയിൽ ചർച്ചയാകുകയാണ്.
ഇരുവർക്കുമിടയിൽ 37 വർഷത്തിന്റെ പ്രായവ്യത്യാസമാണുള്ളത്. ഖുറാൻ മെക്‌കെയ്ൻ എന്ന 24-കാരനും ചെറിൽ മെക്ഗ്രഗർ എന്ന 61കാരിയുമാണ് വ്യത്യസ്തരായ ഈ ദമ്പതികൾ. 2021ൽ വിവാഹിതരായ 24-കാരനും 61-കാരിയും ഏറെ നാളായി സ്വപ്‌നം കണ്ട ഒരു കുഞ്ഞെന്ന മോഹമാണ് ഇപ്പോൾ പൂവണിയാൻ പോകുന്നത്.
വാടക ഗർഭധാരണം വഴി 2023-ൽ ഇവർക്ക് കുഞ്ഞിനെ ലഭിക്കുമെന്ന് ദമ്പതികൾ അറിയിച്ചു. ഇതിനായി 1,20,000 പൗണ്ടാണ് ഇവർ ചിലവഴിച്ചത്. അതായത് 1.14 കോടി ഇന്ത്യൻ രൂപ. വാടക ഗർഭധാരണത്തിലൂടെ കുഞ്ഞിനെ ലഭിക്കാൻ പൊതുവെ 6000 മുതൽ 1,20,000 പൗണ്ട് വരെ തുക ആവശ്യമായി വരുമെന്നും ഖുറാൻ പറയുന്നു.
ഭർത്താവായ ഖുറാന്റെ ആദ്യ കുഞ്ഞാണ് ഇത്തരത്തിൽ ജനിക്കാൻ പോകുന്നത്. എന്നാൽ 61-കാരിയായ ഭാര്യയ്‌ക്ക് ഇതിന് മുമ്പ് ഏഴ് മക്കളും 17 കൊച്ചുമക്കളും ജനിച്ചിട്ടുണ്ട്. താൻ വളരെയധികം സന്തോഷത്തിലാണെന്ന് ഖുറാൻ പ്രതികരിച്ചു. ”’എന്നും ഞാൻ ആഗ്രഹിച്ചിട്ടുള്ള ഒരു കാര്യമാണിത്. ലോകത്തിൽ വെച്ച് ഏറ്റവുമധികം ഇഷ്ടപ്പെടുന്ന ആളോടൊപ്പം ഒരു കുടുംബമുണ്ടാകുക” ഖുറാൻ പറയുന്നു.
പ്രായവ്യത്യാസം മൂലം സമൂഹത്തിൽ നിന്നും ഏറെ വിമർശനം നേരിട്ടവരാണ് രണ്ട് പേരും. ഇരുവരെയും ഒന്നിച്ച് കാണുമ്പോൾ ഖുറാൻ കൊച്ചുമകനാണോയെന്ന ചോദ്യമാണ് ചെറിൽ എപ്പോഴും നേരിടുന്നത്.
അനുകൂലവും പ്രതികൂലവുമായ പ്രതികരണങ്ങളാണ് ചുറ്റുപാട് നിന്നും ഉണ്ടാകുന്നതെന്ന് ഖുറാൻ പ്രതികരിച്ചു. അവയിൽ ഏറ്റവുമധികം വിഷമിപ്പിക്കുന്ന കാര്യം താൻ പണത്തിന് വേണ്ടിയാണ് 61-കാരിയായ ചെറിലിനെ വിവാഹം കഴിച്ചതെന്ന വാദമാണെന്നും അദ്ദേഹം പറഞ്ഞു.
2012ലാണ് ഖുറാൻ ആദ്യമായി ചെറിലിനെ കാണുന്നത്. അന്ന് 15 വയസ് മാത്രമാണ് ഖുറാന്റെ പ്രായം. ചെറിലിന്റെ മകൻ ക്രിസിന്റെ ഉടമസ്ഥതയിലുള്ള റെസ്റ്റോറെന്റിൽ ജോലിക്കെത്തിയതായിരുന്നു ഖുറാൻ. എന്നാൽ എട്ട് വർഷം പിന്നിട്ടപ്പോൾ ഒരു കടയിൽ വെച്ച് വീണ്ടും ചെറിലിനെ ഖുറാൻ കാണാനിടയായി. അതിന് ശേഷമാണ് ഇരുവരും തമ്മിൽ പ്രണയത്തിലാകുന്നത്.
Comments