ചുമയുടെ മരുന്നിന് പകരം തറ തുടയ്‌ക്കുന്ന ലോഷൻ നൽകി; ആശുപത്രിയ്‌ക്കെതിരെ പരാതിയുമായി കുടുംബം- Complaint against hospital

കൊല്ലം : ചുമയുടെ മരുന്നിന് പകരം തറ തുടയ്‌ക്കുന്ന ലോഷൻ നൽകിയെന്ന പരാതിയുമായി ആശുപത്രിയ്‌ക്കെതിരെ കുടുംബം രംഗത്ത്. കൊല്ലം കുളക്കട സാമൂഹികാരോഗ്യ കേന്ദ്രത്തിലാണ് സംഭവം. ഒൻപതാം ക്ലാസുകാരനാണ് മരുന്ന് മാറി നൽകിയത്. ശാരീരിക അസ്വസ്ഥത ഉണ്ടായ കുട്ടിയെ കൊട്ടാരക്കര താലൂക്ക് ആശുപത്രിയിൽ പ്രവേശിപ്പിച്ചു. എന്നാൽ അടിസ്ഥാനരഹിതമായ ആരോപണമാണ് ഉന്നയിക്കുന്നത് എന്നാണ് ആശുപത്രി അധികൃതരുടെ വിശദീകരണം.

കുറ്ററ സ്വദേശിയായ ആശിഖാണ് പിതാവ് അനിൽകുമാറിനൊപ്പം കുളക്കട സാമൂഹിക ആരോഗ്യ കേന്ദ്രത്തിൽ പനിക്ക് ചികിത്സ തേടിയത്. ആശുപത്രിയിൽ നിന്ന് കുപ്പിയിൽ ചുമയുടെ മരുന്നു വാങ്ങി. വീട്ടിലെത്തി മരുന്ന് കഴിച്ചപ്പോൾ കുട്ടിക്ക് ശാരീരിക അസ്വാസ്ഥ്യം അനുഭവപ്പെട്ടെന്നാണ് കുടുംബം പറയുന്നത്. തുടർന്ന് കുട്ടിയെ സാമൂഹിക ആരോഗ്യ കേന്ദ്രത്തിലും പിന്നീട് കൊട്ടാരക്കര താലൂക്കാശുപത്രിയിലും പ്രവേശിപ്പിച്ചു. ചുമയുടെ മരുന്നിന് പകരം ആശുപത്രിയിൽ നിന്ന് നൽകിയത് നിലം തുടയ്‌ക്കുന്ന ലോഷൻ ആണെന്നാണ് ഇവരുടെ ആരോപണം. എന്നാൽ അതിന് യാതൊരു സാധ്യതയുമില്ലെന്ന് അധികൃതർ വിശദീകരിച്ചു.

കുട്ടിയുടെ അച്ഛൻ നൽകിയ പരാതിയിൽ പുത്തൂർ പോലീസ് കേസെടുത്ത് അന്വേഷണം ആരംഭിച്ചു. സംഭവത്തിൽ ഡിഎംഒയ്‌ക്ക് ആശുപത്രി മെഡിക്കൽ ഓഫീസർ റിപ്പോർട്ട് സമർപ്പിച്ചു