ബെയ്ജിംഗ്: ഒരു മണിക്കൂറോളം ചൂടുളള അന്തരീക്ഷത്തിൽ വെച്ചാലും അലിയാത്ത ഐസ്ക്രീം ഉണ്ടോ? നമ്മളിൽ മിക്കവരുടെയും അനുഭവത്തിൽ ഇല്ലായിരിക്കും. പക്ഷെ ചൈനയിൽ ഇന്റർനെറ്റിലെ ചൂടൻ ചർച്ച ഇപ്പോൾ ഇതാണ്.
പ്രമുഖ ചൈനീസ് ഐസ്ക്രീം ബ്രാൻഡായ ചൈസ്ക്രീമിന്റെ ചില ഉത്പ്പന്നങ്ങൾക്കെതിരെയാണ് പരാതി ഉയർന്നത്. ഇതുമായി ബന്ധപ്പെട്ട വീഡിയോകളും ചൈനീസ് സോഷ്യൽ മീഡിയ പ്ലാറ്റ്ഫോമുകളിൽ പ്രത്യക്ഷപ്പെട്ടു തുടങ്ങി. 31 ഡിഗ്രി സെൽഷ്യസിൽ തീയ്ക്ക് മുമ്പിൽ ഒരു മണിക്കൂറോളം മുറിക്കുളളിൽ വെച്ചിട്ടും ഐസ്ക്രീം അലിഞ്ഞില്ലെന്ന് അനുഭവസ്ഥർ പറയുന്നു.
ചൈസ്ക്രീം ഐസ്ക്രീമുകളുടെ വിലയെക്കുറിച്ചും അതിൽ ചേർക്കുന്ന വസ്തുക്കളെക്കുറിച്ചുമുളള ചർച്ചകൾ വെയ്ബോ ഉൾപ്പെടെയുളള സോഷ്യൽ മീഡിയകളിൽ സജീവമാണ്. ഐസ്ക്രീമിന്റെ രസതന്ത്രം മെനഞ്ഞവർ എന്നാണ് ചൈസ്ക്രീം വിശേഷിപ്പിക്കുന്നത്.
വിവാദം സജീവമായതോടെ ചൈനയിലെ ഭക്ഷ്യ സുരക്ഷാ നിയന്ത്രണങ്ങൾ പാലിച്ചാണ് ഉത്പ്പന്നങ്ങൾ ഉണ്ടാക്കുന്നതെന്ന് കമ്പനി ഇന്നലെ അറിയിച്ചു. ഐസ്ക്രീമിന്റെ ഗുണനിലവാരം ചൂടാക്കി പരിശോധിക്കുന്നത് ശാസ്ത്രീയമല്ലെന്നും കമ്പനി വാദിക്കുന്നു.
