കൊളംബോ: സാമ്പത്തിക പ്രതിസന്ധി രൂക്ഷമായിരിക്കുന്ന ശ്രീലങ്കയിൽ രാഷ്‌ട്രീയ അരക്ഷിതാവസ്ഥയും കലാപവും തുടരുന്നു. സർക്കാർ വിരുദ്ധ പ്രക്ഷോഭങ്ങൾക്കിടെ ഒരു യുവാവ് കൊല്ലപ്പെട്ടു. പ്രധാനമന്ത്രിയുടെ ഔദ്യോഗിക വസതിക്ക് മുന്നിൽ നടന്ന പ്രതിഷേധ പ്രകടനങ്ങളുടെ നേർക്ക് സുരക്ഷാ സേന കണ്ണീർ വാതകം പ്രയോഗിച്ചു. ഇതിനെ തുടർന്ന് ശ്വാസതടസ്സമുണ്ടായാണ് 26 വയസ്സുകാരൻ കൊല്ലപ്പെട്ടത് എന്നാണ് പ്രാഥമിക നിഗമനം.
തെരുവിൽ ശക്തമായ പ്രതിഷേധ പ്രകടനം നടത്തിയ പ്രക്ഷോഭകാരികൾ പ്രധാനമന്ത്രിയുടെ ഓഫീസ് കൈയ്യേറി. കലാപം നിയന്ത്രണാതീതമായ പശ്ചാത്തലത്തിൽ ഇടക്കാല പ്രസിഡന്റിന്റെ ചുമതല വഹിക്കുന്ന പ്രധാനമന്ത്രി റനിൽ വിക്രമസിംഗെ, രാജ്യത്ത് അടിയന്തരാവസ്ഥ പ്രഖ്യാപിച്ചിരിക്കുകയാണ്. എന്നാൽ അടിയന്തിരാവസ്ഥ ലംഘിച്ചും തെരുവിൽ ജനങ്ങൾ കലാപം തുടരുകയാണ്.
പാർലമെന്റ് മന്ദിരത്തിന് മുന്നിൽ സ്ഥാപിച്ചിരുന്ന ബാരിക്കേഡുകൾ പ്രക്ഷോഭകാരികൾ മറികടന്നു. പ്രസിഡന്റ് ഗോതാബയ രജപക്സെയും പ്രധാനമന്ത്രി റനിൽ വിക്രമസിംഗെയും രാജി വെക്കണം എന്നതാണ് പ്രക്ഷോഭകരുടെ പ്രാഥമിക ആവശ്യം.
അതേസമയം, പ്രസിഡന്റ് ഗോതാബയ രജപക്സെ ഉടൻ രാജി വെക്കുമെന്ന് സ്പീക്കർ അറിയിച്ചു. പുതിയ പ്രസിഡന്റിന്റെ ഒരാഴ്ചയ്‌ക്കുള്ളിൽ പ്രഖ്യാപിക്കുമെന്നും അദ്ദേഹം വ്യക്തമാക്കി. ശ്രീലങ്കയിലെ സുപ്രധാന കേന്ദ്രങ്ങളിൽ നിയന്ത്രണം സൈന്യം ഏറ്റെടുത്തിരിക്കുകയാണ്.
Comments