മുംബൈ: വെള്ളം തിളപ്പിച്ചുകൊണ്ടിരുന്ന ചെമ്പിലേക്ക് വീണ് 16 മാസം പ്രായമുള്ള കുഞ്ഞ് മരിച്ചു. ഗുരുതരമായി പൊള്ളലേറ്റ കുഞ്ഞ് ചികിത്സയിലിരിക്കെയാണ് മരിച്ചത്. അപകടം സംഭവിച്ച് ഒരാഴ്ച പിന്നിട്ടപ്പോഴായിരുന്നു മരണം. ഒരു വർഷവും നാല് മാസവും പ്രായമുള്ള ഹസ്‌നെയ്ൻ കെ. പത്തൻ എന്ന കുഞ്ഞാണ് വിവാഹ ആഘോഷങ്ങൾക്കിടെ അപകടത്തിൽപ്പെട്ടത്.
മഹാരാഷ്‌ട്രയിലെ പലോഡ് ഗ്രാമത്തിൽ ജൂലൈ 6ന് വിവാഹ ആഘോഷങ്ങൾ നടക്കുകയായിരുന്നു. നവദമ്പതികളെ ആശീർവദിക്കാൻ വിവാഹദിവസം വൈകിട്ട് സത്കാരം സംഘടിപ്പിച്ചു. ഭക്ഷണം പാകം ചെയ്യുന്ന പന്തലിൽ കുഞ്ഞ് എത്തിപ്പെട്ടു. സമീപത്തെ അടുപ്പിൽ അരി വേവിക്കാൻ വെച്ച ചെമ്പിൽ വെള്ളം തിളക്കുന്നുണ്ടായിരുന്നു. ചെമ്പിനടുത്തേക്ക് ഓടിയ കുഞ്ഞ് പെട്ടെന്ന് മറിഞ്ഞുവീണു.
കുട്ടിയുടെ നിലവിളി കേട്ട് മാതാപിതാക്കൾ ഓടിയെത്തിയപ്പോഴേക്കും ഹസ്‌നെയ്‌ന് അതിഗുരുതരമായി പൊള്ളലേറ്റിരുന്നു. ഉടനെ തന്നെ സമീപത്തെ സ്വകാര്യ ആശുപത്രിയിലും പിന്നീട് ഘാട്ടി സർക്കാർ ആശുപത്രിയിലും എത്തിച്ച് ചികിത്സ നൽകി. ഒടുവിൽ വ്യാഴാഴ്ച വൈകിട്ട് മരണത്തിന് കീഴടങ്ങുകയായിരുന്നു. സംഭവത്തിൽ പോലീസ് അപകടമരണത്തിന് കേസ് രജസിറ്റർ ചെയ്തിട്ടുണ്ട്.
Comments