എന്ത് !! ലോട്ടറി അടിച്ചെന്നോ ; എന്നാൽ കിട്ടും സമ്മാന തുകയ്‌ക്കൊപ്പം ബോധവത്കരണവും

തിരുവനന്തപുരം : ലോട്ടറിയടിച്ചാൽ സമ്മാന തുകയ്‌ക്കൊപ്പം ഇനി ബോധവത്കരണ ക്ലാസും . ഇത്തരത്തിൽ കിട്ടുന്ന തുക ധൂർത്തടിക്കുന്നത് തടയാനാണ് ബോധവത്കരണം നൽകുന്നത്. കിട്ടിയ തുക എങ്ങനെ കൈകാര്യം ചെയ്യാമെന്ന് വിജയികളെ ലോട്ടറി വകുപ്പ് പഠിപ്പിക്കും. ഫലപ്രദമായി പണം എങ്ങനെ നിക്ഷേപിക്കാമെന്ന് വിദഗ്ധരാവും പഠിപ്പിക്കുക. ഇതിനായി സമ്മാനത്തിന് അർഹരായവർ ലോട്ടറി വകുപ്പ് നടത്തുന്ന ക്ലാസുകളിൽ പങ്കെടുക്കണം.

ഇത്തവണത്തെ ആദ്യത്തെ ക്ലാസ് ലഭിക്കുക ഓണം ബംപർ വിജയികൾക്കാണ്. എല്ലാ വിജയികളെയും ധനമാനേജ്‌മെന്റ് പഠിപ്പിക്കുന്നതിന്റെ ഭാഗമായിട്ടാണ് ഇത്. നിക്ഷേപ പദ്ധതികൾ, നികുതി ഘടന എന്നീ വിഷയങ്ങളെ മുൻനിർത്തിയാകും ക്ലാസുകൾ.

ക്ലാസ് നടക്കുക ഗുലാത്തി ഇൻസ്റ്റിറ്റ്യൂട്ട് ഓഫ് ഫിനാൻസ് ആൻഡ് ടാക്‌സേഷനിലായിരിക്കും. പങ്കെടുക്കുന്നവർക്ക് ബുക്ക് ലെറ്റുകളും വിതരണം ചെയ്യും.

സംസ്ഥാനത്ത് ലോട്ടറി അടിക്കുന്നതിൽ കൂടുതലും സാധാരണക്കാരാണ്. പലരും ഇത്ര അധികം തുക ലഭിച്ചിട്ടും വീണ്ടും സാമ്പത്തിക പ്രതിസന്ധിയിൽ ആകുന്ന സ്ഥിതിയാണ് ഉള്ളത്. ലഭിക്കുന്ന തുക എങ്ങനെ സുരക്ഷിതമായി ഉപയോഗിക്കാം എന്ന് അറിയാത്തതാണ് ഇതിലെ പ്രധാന പ്രശ്‌നം. ഇത് ഒഴിവാക്കി ആളുകൾക്ക് മാർഗനിർദ്ദേശം നൽകുകയാണ് ലക്ഷ്യമെന്ന് ലോട്ടറി ഡയറക്ടർ വ്യക്തമാക്കി.