തിരുവനന്തപുരം: യുവമോർച്ച പ്രവർത്തകൻ പ്രവീൺ നെട്ടാരുവിന്റെ കൊലപാതകവുമായി ബന്ധപ്പെട്ട അന്വേഷണത്തിനായി കർണാടക പോലീസ് കേരളത്തിൽ. വിവിധ ഭാഗങ്ങളിൽ പ്രതികൾക്കായി പോലീസ് തിരച്ചിൽ നടത്തും. നിലവിൽ കേസ് എൻഐഎയ്‌ക്ക് കൈമാറിയെങ്കിലും അന്വേഷണ സംഘം എത്തും വരെ പരിശോധന തുടരാനാണ് കർണാടക പോലീസിന്റെ തീരുമാനം.
ഇന്നലെയാണ് പോലീസ് സംഘം കേരളത്തിൽ ക്യാമ്പ് ചെയ്ത് പരിശോധനകൾ ആരംഭിച്ചത്. കൊലയാളികൾ കേരളത്തിൽ നിന്നുള്ളവരാണെന്നാണ് പോലീസിന് ലഭിച്ചിരിക്കുന്ന വിവരം. അതിനാൽ കൊലപാതകികൾ കൃത്യത്തിന് ശേഷം ഇവിടേക്ക് കടക്കാൻ സാദ്ധ്യതയുണ്ട്. ഇത് പരിഗണിച്ചാണ് കേരളത്തിൽ പോലീസ് ക്യാമ്പ് ചെയ്തിരിക്കുന്നത്.
കേരള – കർണാടക അതിർത്തിയായ ബെല്ലാരിയിൽ ശക്തമായ പരിശോധനയാണ് പോലീസ് നടത്തുന്നത്. നിരീക്ഷണത്തിനായി സിസിടിവി ക്യാമറകൾ ഉൾപ്പെടെ സ്ഥാപിച്ചിട്ടുണ്ട്. പ്രവീൺ നെട്ടാരുവിനെക്കുറിച്ച് കൊലപാതകികൾക്ക് വിവരം നൽകിയ രണ്ട് പോപ്പുലർഫ്രണ്ട് മത തീവ്രവാദികളെ ബെല്ലാരിയിൽ നിന്നും പോലീസ് പിടികൂടിയിരുന്നു. ഈ സാഹചര്യത്തിൽ കൂടിയാണ് കേരളത്തിലേക്ക് കർണാടക പോലീസ് സംഘം പരിശോധനയ്‌ക്കായി എത്തിയത്.
Comments