ഒടിടി റിലീസിൽ മികച്ച പ്രതികരണം നേടി അനൂപ് എസ് പണിക്കർ സംവിധാനം ചെയ്ത കടാവർ. ഡയറക്റ്റ് ഒടിടി റിലീസ് ആയി എത്തിയ ചിത്രം ഡിസ്‌നി പ്ലസ് ഹോട്ട്സ്റ്റാറിന്റെ ട്രെൻഡിംഗ് ലിസ്റ്റിൽ ഉണ്ട്. അമല പോൾ കേന്ദ്ര കഥാപാത്രമായി എത്തുന്ന ചിത്രം ഫോറൻസിക് ക്രൈം ത്രില്ലർ വിഭാഗത്തിൽ ഉൾപ്പെടുന്നതാണ്.ചിത്രത്തിൽ തമിഴ്‌നാട്ടിലെ ചീഫ് പൊലീസ് സർജനായ ഡോ. ഭദ്ര എന്ന കഥാപാത്രമായി ആണ് അമല എത്തുന്നത്.
സിനിമയുടെ തിരക്കഥ ഒരുക്കിയിരിക്കുന്നത് അഭിലാഷ് പിള്ളയാണ് . മലയാള ചിത്രങ്ങളായ പത്താം വളവ്, നൈറ്റ് ഡ്രൈവ് എന്നീ ചിത്രങ്ങൾക്ക് തിരക്കഥ ഒരുക്കിയിരിക്കുന്നതും ഇദ്ദേഹമാണ്.യഥാർഥ സംഭവങ്ങളിൽ നിന്നും പ്രചോദനം ഉൾക്കൊണ്ടുള്ളതാണ് ചിത്രത്തിന്റെ പ്രമേയം
കഴിഞ്ഞ വർഷം ആദ്യമാണ് സിനിമയുടെ ചിത്രീകരണം പൂർത്തിയായത്. പിന്നാലെ തീയേറ്റർ റിലീസ് സംബന്ധിച്ച വാർത്തകൾ വന്നെങ്കിലും ഇത് ഒടിടിയിലേക്ക് മാറുകയായിരുന്നു. തമിഴ്, തെലുങ്ക്, ഹിന്ദി, കന്നഡ, മലയാളം എന്നീ ഭാഷകളിൽ ഡിസ്‌നി പ്ലസ് ഹോട്ട്സ്റ്റാറിൽ ചിത്രം കാണാനാവും.
അമല പോൾ പ്രൊഡക്ഷൻസ് ബാനറിൽ അമല പോൾ തന്നെയാണ് ചിത്രം നിർമ്മിച്ചിരിക്കുന്നത്.അന്നീസ് പോൾ, തൻസീർ സലാം എന്നിവരാണ് സഹനിർമ്മാണം. ഛായാഗ്രഹണം അരവിന്ദ് സിംഗ്, കലാസംവിധാനം രാഹുൽ, വരികൾ കബിലൻ, ശക്തി മഹേന്ദ്ര, സംഗീതം രഞ്ജിൻ രാജ്, എഡിറ്റിംഗ് സാൻ ലോകേഷ്, സ്റ്റിൽസ് റാം സുബ്ബു.
