ലക്നൗ: പരീക്ഷ നടപടികൾ സുതാര്യമാക്കുന്നതിന്റെ ഭാഗമായി ലക്നൗവിൽ വാർ റൂം സജ്ജമാക്കാനൊരുങ്ങി ഉത്തർപ്രദേശ് സർക്കാർ. എല്ലാ പരീക്ഷ കേന്ദ്രങ്ങളെയും ബന്ധിപ്പിച്ച് കൊണ്ട് ലക്നൗ ആസ്ഥാനമാക്കിയാകും വാർ റൂം പ്രവർത്തിക്കുകയെന്ന് ഉന്നത വിദ്യാഭ്യാസ മന്ത്രി യോഗേന്ദ്ര ഉപാദ്ധ്യായ വ്യക്തമാക്കി. പദ്ധതിയ്ക്കായി കൂടുതൽ ചർച്ചകൾ സെപ്തംബറിൽ നടത്തും.
ദേശീയ വിദ്യാഭ്യാസ നയം പ്രകാരമുള്ള മാറ്റങ്ങളുടെ ആരംഭമാണിതെന്നും മന്ത്രി കൂട്ടിച്ചേർത്തു. ഇന്ത്യൻ സംസ്കാരവും ആധുനിക വിദ്യാഭ്യാസത്തിന്റെ വികസനവും ഒത്തുച്ചേരുന്നതിനാൽ വിദ്യാഭ്യാസ മേഖലയെ തന്നെ മാറ്റാൻ സാധിക്കുമെന്നും അദ്ദേഹം പറഞ്ഞു.
ബാല്യകാല വിദ്യാഭ്യാസം മുതൽ ഉന്നത വിദ്യാഭ്യാസം, തൊഴിൽ പരിശീലനം എന്നിവ വരെയുള്ള വിദ്യാഭ്യാസത്തിന്റെ എല്ലാ വശങ്ങളും ഉൾക്കൊള്ളുന്ന ഒരു സമഗ്ര നയമാണ് ദേശീയ വിദ്യാഭ്യാസ നയം. വരുന്ന പത്തു വർഷത്തിൽ രാജ്യത്തെ വിദ്യാഭ്യാസ മേഖലയെക്കുറിച്ചുള്ള സർക്കാരിന്റെ കാഴ്ചപ്പാട് വിശദീകരിക്കുന്ന നയ രേഖയാണ് എൻഇപി.പുതിയ ദേശീയ വിദ്യാഭ്യാസ നയം വിദ്യാർത്ഥികളുടെ വ്യക്തിഗത ആവശ്യങ്ങൾക്ക് ഊന്നൽ നൽകുന്നു. കുട്ടികൾക്ക് ലോകോത്തര വിദ്യാഭ്യാസം ലഭ്യമാക്കുകയും വിദ്യാർത്ഥികളുടെയും സമ്പദ്വ്യവസ്ഥയുടെയും ആവശ്യങ്ങൾ നിറവേറ്റാൻ കഴിയുന്ന കൂടുതൽ വഴക്കമുള്ളതും പൊരുത്തപ്പെടുന്നതുമായ വിദ്യാഭ്യാസ സമ്പ്രദായം സൃഷ്ടിക്കാനും നയം ശ്രമിക്കുന്നു.
