ന്യൂഡൽഹി: സ്വാതന്ത്ര്യത്തിന്റെ അമൃത മഹോത്സവത്തിന്റെ ഭാഗമായി പ്രഖ്യാപിക്കപ്പെട്ട ഹർ ഘർ തിരംഗ പ്രചാരണം ഏറ്റെടുത്ത് രാജ്യം. ഇന്ന് ഉച്ച വരെയുള്ള കണക്ക് പ്രകാരം ഹർ ഘർ തിരംഗാ വെബ്സൈറ്റിൽ അപ്ലോഡ് ചെയ്യപ്പെട്ടിരിക്കുന്നത് ത്രിവർണ പതാകകൾക്കൊപ്പമുള്ള 44 ദശലക്ഷം സെൽഫികളാണ്. ആഘോഷങ്ങളുടെ ഭാഗമായി, കേന്ദ്ര സർക്കാരിന്റെ പാത പിന്തുടർന്ന് നിരവധി പേരാണ് കോളർ ട്യൂണുകൾ ദേശഭക്തി ഗാനങ്ങളാക്കിയിരിക്കുന്നത്.
വെബ്സൈറ്റിൽ ഇതിനോടകം 50 ദശലക്ഷത്തിൽ പരം ഡിജിറ്റൽ പതാകകളും പിൻ ചെയ്തിട്ടുണ്ട്. കേന്ദ്ര ആഭ്യന്തര മന്ത്രി അമിത് ഷാ, നടന്മാരായ അമിതാഭ് ബച്ചൻ, രജനികാന്ത്, അനുപം ഖേർ, ക്രിക്കറ്റ് താരങ്ങളായ സച്ചിൻ ടെണ്ടുൽക്കർ, രോഹിത് ശർമ്മ തുടങ്ങിയവർ നേരത്തെ തന്നെ തിരംഗ സെൽഫികൾ അപ്ലോഡ് ചെയ്തിരുന്നു.
സ്വാതന്ത്ര്യത്തിന്റെ എഴുപത്തിയഞ്ചാം വാർഷികം ആഘോഷിക്കുന്നതിന്റെ ഭാഗമായി 2021 മാർച്ച് 12 ന്, 75 ആഴ്ചകൾ നീണ്ടു നിൽക്കുന്ന വിപുലമായ പരിപാടികൾക്കാണ് കേന്ദ്ര സർക്കാർ തുടക്കം കുറിച്ചത്. ഗുജറാത്തിലെ സബർമതി ആശ്രമത്തിൽ പ്രധാനമന്ത്രി നരേന്ദ്ര മോദി ആയിരുന്നു ആഘോഷ പരിപാടികൾ ഉദ്ഘാടനം ചെയ്തത്.
ഹർ ഘർ തിരംഗ വൻ വിജയമാക്കണമെന്ന് പ്രധാനമന്ത്രി നരേന്ദ്ര മോദി ആഹ്വാനം ചെയ്തിരുന്നു. ദേശീയ പതാകയുമായി നമുക്കുള്ള ബന്ധം ശക്തിപ്പെടുത്താൻ ഇതിലൂടെ സാധിക്കുമെന്നും പ്രധാനമന്ത്രി പറഞ്ഞിരുന്നു.
Comments