പത്തനംതിട്ട: ഇന്ത്യയുടെ മഹത്തായ ദർശനം ഉപനിഷത്താണെന്ന് ആരോഗ്യ മന്ത്രി വീണ ജോർജ്. എല്ലാ മതങ്ങളും പരസ്പരം സ്നേഹിക്കാനും ബഹുമാനിക്കാനുമാണ് പഠിപ്പിക്കുന്നത്. ഭാരതത്തിലെ ഋഷിവര്യന്മാർ പകർന്നു നൽകിയ ഉപനിഷത് ദർശനം മുന്നോട്ട് വെയ്ക്കുന്നത് നാമെല്ലാം ഒന്നാണെന്ന അർത്ഥം വരുന്ന തത്വമസി സന്ദേശമാണെന്ന് മന്ത്രി പറഞ്ഞു. ഇന്ത്യയുടെ 76-മത് സ്വാതന്ത്ര്യ ദിനത്തോടനുബന്ധിച്ച് നടന്ന സ്വാതന്ത്ര്യ ദിന സന്ദേശത്തിൽ സംസാരിക്കുകയായിരുന്നു മന്ത്രി.
1947 ഇന്ത്യക്ക് സ്വാതന്ത്ര്യം ലഭിച്ച വേളയിൽ ജവഹർലാൽ നെഹ്റു പറഞ്ഞത് രാജ്യത്തെ ജനങ്ങളെ സേവിക്കാൻ ലഭിച്ച അവസരം നമ്മൾ ഉപയോഗപ്പെടുത്തണമെന്നാണ്. നെഹ്റുവിന്റെ സന്ദേശം മുൻ നിർത്തി നടത്തിയ പ്രസംഗത്തിൽ നാടിന്റെ ജനാധിപത്യ മൂല്യങ്ങളും ഭരണഘടനാ തത്വങ്ങളും മുറുകെ പിടിക്കാൻ താനുൾപ്പെടുന്ന ഭരണാധികാരികൾ പ്രതിജ്ഞ ബദ്ധമാണെന്ന് പറഞ്ഞു.
ഭരണാധികാരികൾ ജനങ്ങളുടെ സുരക്ഷയ്ക്കും , നന്മക്കും വേണ്ടി പ്രവർത്തിക്കണം. ജനങ്ങളുടെ വിഷമതകൾ മനസിലാക്കി അവരിലേക്കിറങ്ങിച്ചെല്ലാൻ ഓരോ ഭരണാധികാരികളും തയ്യാറാകണമെന്നും ആരോഗ്യ മന്ത്രി വീണ ജോർജ് കൂട്ടി ചേർത്തു.
