ശ്രീനഗർ: ജമ്മു കശ്മീരിലെ ഷോപ്പിയാനിൽ കശ്മീരി പണ്ഡിറ്റിനെ കൊലപ്പെടുത്തിയ കേസിൽ ആക്രമണം നടത്തിയ ഭീകരന്റെ വീട് കണ്ടുകെട്ടി പോലീസ്. ഭീകരൻ ആദിൽ വാനിയുടെ വീട് കണ്ടുകെട്ടിയതിനോടൊപ്പം കുടുംബാംഗങ്ങളെയും പോലീസ് അറസ്റ്റ് ചെയ്തു.
ആദിൽ വാനി ഭീകരനാണെന്നറിഞ്ഞിട്ടും താമസ സൗകര്യമേർപ്പെടുത്തിയതിനാണ് വീട്ടുകാരെ പോലീസ് അറസ്റ്റ് ചെയ്തത്. പിതാവും മൂന്ന് സഹോദരന്മാരുമാണ് അറസ്റ്റിലായത്. നിരോധിത സംഘടനയായ അൽ-ബാദറിന്റെ സജീവ പ്രവർത്തകനാണ് ആദിൽ. ഇയാളുടെ വീട്ടിൽ പരിശോധന നടത്തിയതിന് പിന്നാലെ ആയുധങ്ങളും സ്‌ഫോടക വസ്തുക്കളും പോലീസ് കണ്ടെടുത്തിരുന്നു. ഇതാണ് കുടുംബത്തെ അറസ്റ്റ് ചെയ്യാനുള്ള തീരുമാനത്തിലേക്ക് പോലീസിനെ എത്തിച്ചത്.
കശ്മീരിലെ ഷോപ്പിയാൻ ജില്ലയിൽ ബുധനാഴ്ചയായിരുന്നു കശ്മീരി പണ്ഡിറ്റുകളായ സഹോദരന്മാരെ ഭീകരൻ ആദിൽ വാനി വെടിവെച്ചത്. ആപ്പിൾ തോട്ടത്തിൽ വെച്ചായിരുന്നു ആക്രമണം. 45 കാരനായ സുനിൽ കുമാർ സംഭവസ്ഥലത്ത് വെച്ചുതന്നെ കൊല്ലപ്പെട്ടു. ഗുരുതരമായി പരിക്കേറ്റ സഹോദരൻ പിന്റു കുമാർ നിലവിൽ ആശുപത്രിയിലാണ്.
ഭീകരർക്ക് സുരക്ഷിത താവളം ഒരുക്കിയാൽ കർശനമായ നിയമനടപടി നേരിടേണ്ടി വരുമെന്ന് ജമ്മുകശ്മീർ പോലീസ് നേരത്തെ വ്യക്തമാക്കിയിരുന്നു. ഇത്തരത്തിലുള്ള വസതികൾ കണ്ടുകെട്ടുമെന്നും പോലീസ് അറിയിച്ചിട്ടുണ്ട്. അതുകൊണ്ട് തന്നെ ഭീകരർക്ക് ഒരുകാരണവശാലും പാർപ്പിട സൗകര്യമൊരുക്കരുതെന്നാണ് കശ്മീർ പോലീസിന്റെ നിർദേശം.
Comments