കൊച്ചി: 2019 ൽ മോഹൻലാലിനെ നായകനാക്കി പുറത്തിറങ്ങി പൃഥ്വിരാജ് സുകുമാരന്റെ ആദ്യ സംവിധാന സംരംഭമാണ് ലൂസിഫർ. തിയേറ്ററുകൾ ഇളക്കി മറിക്കാനാവശ്യമായ എല്ലാ ചേരുവകളോടുമെത്തിയ ലൂസിഫർ 175 കോടിയിലധികം രൂപ കളക്ഷൻ നേടിയിരുന്നു.
ചിത്രം തിയേറ്ററുകളിലെത്തും മുൻപ് തന്നെ രണ്ടാം ഭാഗമുണ്ടാകുമെന്ന് അണിയറ പ്രവർത്തകർ പ്രഖ്യാപിച്ചിരുന്നു. എന്നാൽ ചിത്രം പുറത്തിറങ്ങി ഇത്ര വർഷമായിട്ടും ലൂസിഫറിന്റെ രണ്ടാം ഭാഗം എന്ന് വരുമെന്നായിരുന്നു ആരാധകരുടെ ചോദ്യം. എന്നാൽ ഈ കാത്തിരിപ്പിന് അവസാനമായെന്നാണ് അണിയറ പ്രവർത്തകർ അറിയിച്ചിരിക്കുന്നത്.
തിയേറ്ററുകൾ കീഴടക്കാൻ എമ്പുരാൻ എത്തുമെന്നാണ് പ്രഖ്യാപിച്ചിരിക്കുന്നത്. മോഹൻലാലും പൃഥ്വിരാജും തിരക്കഥാകൃത്ത് മുരളി ഗോപിയും ആന്റണി പെരുമ്പാവൂരും ചേർന്നാണ് ഇക്കാര്യം അറിയിച്ചിരിക്കുന്നത്. ഇന്ന് പുറത്തു വിട്ട യൂട്യൂബ് വീഡിയോയിലൂടെയാണ് ‘എമ്പുരാന്റെ’ പ്രഖ്യാപനം നടത്തിയത്.
‘ലൂസിഫർ’ എന്ന സിനിമയ്ക്ക് നിങ്ങൾ നൽകിയ വലിയ വിജയം കാരണം ഇത്തവണ കുറച്ചുകൂടി വലിയ രീതിയിലാണ് ഞങ്ങൾ കാണുന്നത്. എപ്പോൾ തിയറ്ററിൽ എത്തും എന്നൊന്നും ഇപ്പോൾ പറയാൻ പറ്റുന്ന ഒരു സിനിമയല്ല. വരും ദിവസങ്ങളിൽ സിനിമയുടെ വിശേഷങ്ങൾ അറിയിക്കുമെന്ന് പൃഥ്വിരാജ് പറഞ്ഞു. വലിയ അവകാശവാദങ്ങളൊന്നുമില്ലെന്നും ഒരു കൊമേഴ്സ്യൽ എന്റർടെയ്നറായിരിക്കുമെന്നും പൃഥ്വിരാജ് വ്യക്തമാക്കി.
