കൊച്ചി: അനാരോഗ്യകരമാണെങ്കിലും ഫാസ്റ്റ് ഫുഡ് പ്രേമികൾക്കിടയിൽ പ്രത്യേക സ്ഥാനമുള്ള ഒരു വിഭവമാണ് പൊറോട്ട. കേരളീയ ഭക്ഷണം എന്ന് വരെ ഭക്ഷണപ്രേമികൾക്കിടയിൽ അറിയപ്പെടുന്ന പൊറോട്ട ഇഷ്ടപ്പെടാത്ത മലയാളികളില്ല. പൊറോട്ടയില്ലാതെ മലയാളിയില്ല. അത്രയ്ക്കുണ്ട് മലയാളികളുടെ പൊറോട്ട പ്രേമം.
ഒളിമ്പിക് മെഡൽ നേടുന്നത് വരെ പൊറോട്ട കഴിക്കില്ലെന്ന് ദൃഢ പ്രതിജ്ഞ എടുത്ത ആളെക്കുറിച്ച് അറിയാമോ? കോമൺവെൽത്ത് ഗെയിംസിൽ വെള്ളിമെഡൽ ജേതാവായ ശ്രീശങ്കർ മുരളിയാണ് ഈ വിചിത്രമായ പ്രതിജ്ഞ എടുത്തയാൾ. 23 കാരനായ ലോങ് ജമ്പ് താരം കോമൺവെൽത്ത് ഗെയിംസിലെ മിന്നും വിജയത്തിന് ശേഷവും ആ പ്രതിജ്ഞ ലംഘിച്ചിട്ടില്ല. എന്താണ് ഇത്ര കടുത്ത തീരുമാനത്തിന് കാരണമെന്നല്ലേ? അതിന് പിന്നിൽ രസകരമായൊരു കഥയുണ്ട്.
2019 ൽ പൊറോട്ട കഴിക്കുകയായിരുന്നു ശ്രീശങ്കർ. മൊരിഞ്ഞ പൊറോട്ട അങ്ങനെ അകത്താക്കുമ്പോൾ ഉടനെ അച്ഛന്റെ കമന്റെത്തി. നീ ഇങ്ങനെ ഇത് കഴിച്ചുകൊണ്ടിരുന്നോ, മറ്റ് താരങ്ങൾ 8.15 മീറ്ററും അതിന് മുകളിലും ചാടുന്നു. അന്ന് ശ്രീശങ്കർ ടോക്കിയോ ഒളിമ്പിക്സ് വരെ പൊറോട്ട കഴിക്കില്ലെന്ന് തീരുമാനമെടുത്തു.
എന്നാൽ ടോക്കിയോ ഒളിമ്പിക്സിൽ മികച്ച പ്രകടനം പുറത്തെടുക്കാൻ ശ്രീശങ്കറിനായില്ല. 7.69 മീറ്റർ ചാടി ഹീറ്റ്സിൽ 24 ാം സ്ഥാനത്തെത്താനേ കഴിഞ്ഞുള്ളൂ. കൊറോണയ്ക്ക് ശാരീരികമായി ഏറെ തളർന്ന ശ്രീശങ്കർ എട്ടാം സ്ഥാനമെങ്കിലും പ്രതീക്ഷിച്ചിരുന്നു. എന്നാൽ കൊറോണാന്തര ബുദ്ധിമുട്ടുകൾ പരിശീലനത്തെ പലപ്പോഴും തടസ്സപ്പെടുത്തിയെന്ന് താരം പറയുന്നു.
എന്തായാലും ഇനി ഒളിമ്പിക്സ് മെഡൽ ഇന്ത്യക്കായി നേടിയിട്ടേ പൊറോട്ട കഴിക്കുകയുള്ളൂ എന്ന് താരം ഉറപ്പിച്ച് പറയുന്നു. അതിനായി ഇനി നാലു വർഷം അധികം കാത്തിരിക്കേണ്ടി വന്നാലും. മെഡലില്ലാതെ പൊറോട്ടയില്ലയില്ലെന്ന് സാരം.
Comments